Жон Хопкинс университети (АҚШ) қошидаги Марказий Осиё ва Кавказ институти раиси Фредерик Старр Ўзбекистонда 4 декабрь куни бўлиб ўтадиган Президент сайлови жараёнида иштирок этиш мақсадида ташриф буюрган халқаро кузатувчилар қаторида мамлакатда бўлиб турибди. Бу ҳақда «Газета.uz» хабар бермоқда.
Тошкентда бўлиб ўтган, сайлов ўтказишнинг конституцион-ҳуқуқий асосларига бағишланган конференция чоғида журналистлар билан суҳбат қилар экан, Фредерик Старр сиёсий партиялар ривожини кўриш диққатга сазовор эканлигини таъкидлаб ўтди. Экспертнинг фикрича, партиялар ҳақиқий, тирик органларга айланди ва улар амалий қадамлар ташламоқда.
«Бу ерда кузатувчи сифатида бўлишдан жуда хурсандман. Ўзбек халқини сайловдан олдиноқ айрим ютуқлар билан табрикламоқчиман. Бир нарсани тан олиш муҳимки, бунинг бари мамлакат етакчисининг вафотидан сўнг, катта ўзгаришлар пайтида бўлиб ўтмоқда. Бутун дунёда ҳам ўзгаришлар баъзан хавфли бўлиши мумкин. Аммо бу ерда улар тинч ва қонуний ўтмоқда. Ўйлайманки, бу мамлакатнинг сиёсий ва ижтимоий ривожини кўрсатувчи улкан ютуқдир», — деди Старр.
Эксперт ўзбекистонликлар психологик нуқтаи назардан ўзларини фуқаро деб ҳис этаётганини алоҳида қайд қилди.
«Мамлакатнинг Биринчи Президент вафотидан кейинги ҳаёти етукликни ҳамда фуқаролик жамияти моҳиятининг чуқур англанаётганини кўрсатади», — деди у.
Изоҳ (0)