ЎзПФЛ Биринчи Лигада мухлисларни ҳақорат қилган футболчини жазолади
Ўзбекистон Профессионал футбол лигаси Тартиб-интизом қўмитасининг навбатдаги йиғилишида қоидабузар футболчиларга нисбатан қарорлар чиқарилди. Бу ҳақда ташкилот расмий сайти хабар бермоқда.
Хабар беришларича, футбол бўйича Ўзбекистон Биринчи Лигасининг 31-туридан ўрин олган «Косонсой» — «Уз-Донг-Жу» учрашуви якунланишига етти дақиқа қолганида меҳмонлар ҳимоячиси Шаробиддин Собиров мухлисларни ҳақорат қилган ва бу қилмиши учун майдондан четлатилган.
Вазиятни ўрганиб чиққан ЎзПФЛ Тартиб-интизом қўмитаси Шаробиддин Собировни Биринчи Лиганинг 3 та ўйинига дисквалификация қилиш ҳақида қарор қабул қилган.
113 нафар томошабин гувоҳлиги остида ўтган ўйинда футболчи нима сабабдан мухлисларни ҳақорат қилганига аниқлик киритилмаган. Собиров четлатилганидан сўнг «Уз-Донг-Жу» яна бир гол ўтказиб юборган ва учрашув 3:1 ҳисобида «Косонсой» ғалабаси билан тугаган.
Қўмитанинг аввалги йиғилишида ҳам мухлисларни ҳақорат қилган Биринчи Лигадаги бошқа бир футболчига нисбатан чора кўрилган эди. Хабар беришларича, «Цементчи»га қарши 28-тур ўйинида мухлисларни ҳақорат қилгани учун майдондан четлатилган «Ёзёвон-Лочинлари» ҳимоячиси Дилшод Эминов 4 та ўйинга дисквалификация қилинган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
