Россиянинг «Прогресс МС-02» юк ташувчи космик кемаси Тинч океанининг кемалар ўтмайдиган ҳудудида чўктирилди. Бу ҳақда, Парвозларни бошқариш марказига асосланиб, «Интерфакс» хабар бермоқда.
«‘Прогресс МС-02’ парвозини якунлади. Ҳисоб-китобларга қараганда, Москва вақти билан 15:50 да кема атмосферанинг зич қатламларига кирди. Шундан сўнг унинг ёнмас қисмлари Тинч океани акваториясининг белгиланган ҳудудига қулади», — дейилади хабарда.
Кема Бойқўнғир космодромидан 31 мартда учирилган бўлиб, 2 апрелдан буён Халқаро космик станция таркибида эди. «Прогресс» станцияга 2,4 тонна ҳар хил юклар етказиб берди. Транспорт кемаси парвози даврида станцияда унинг двигателлари ёрдамида тўртта режали орбита коррекцияси ўтказилди.