Рио–2016 Паралимпиадаси очилиш маросимида Россия байроғини кўтарган беларусга квартира ваъда қилинди
Халқаро паралимпия қўмитасининг тақиқига қарамай, Рио–2016 Паралимпия ўйинлари очилиш маросимида Россия байроғини кўтарган беларусга квартира ваъда қилинди. Бу ҳақда TJournal хабар бермоқда.
Россия Ташқи ишлар вазирлигининг расмий вакили Мария Захарова унинг таниши Facebook’даги саҳифасига антиқа таклиф билан мурожаат қилганини айтди. Исми маълум қилинмаган россиялик эркак Рио–2016 Паралимпия ўйинлари очилиш маросимида Россия байроғини кўтариб чиққан Беларусь спорт ва туризм вазирлиги ходими – Андрей Фомочкинга квартира совға қилиш истагини билдирди.
«Барчасини батафсил айтмайман. Квартира ҳақиқий, тайёр бинода жойлашган. Мен шахсан ўзим текширдим. Сирли граф Монте-Кристо ким эканини ва беларуслик қаҳрамонимиз бундай совғага қандай муносабат билдиришини эртага кўрасизлар. Чунки Андрей Фомочкин бугун Москвага келди», – деб ёзди Мария Захарова Facebook’даги саҳифасига.
Россия терма жамоаси 7—18 сентябрь кунлари ўтказилган Рио–2016 Паралимпия ўйинларида иштирок этмади. Фомочкин эса «Маракана» стадионида бўлиб ўтган мусобақанинг очилиш маросимида Россия байроғини кўтариб чиқди. Кейинроқ Фомочкин аккредитациясидан маҳрум этилганди.
