Тошкентда 1 октябрь, шанба куни Мустақиллик кўчасининг аввал ёпилган бир қанча участкаларини очишга тайёргарлик ишлари бошланди. Бу ҳақда «Газета.uz» хабар бермоқда.
Қурилиш техникалари ва ишчилар Мустақиллик ва Абдулла Қодирий кўчалари чорраҳасидаги йўл ўтказгич (Ҳамид Олимжон майдони) қаршисидаги қиялик йўлини тозаламоқда. Тошкент шаҳар ҳокимлиги вакиллари мазкур участка айнан қайси муддатда очилишини маълум этгани йўқ, бироқ ишлар жадаллик билан олиб борилишини ваъда қилмоқда. Мазкур йўлнинг очилиши шоҳ кўчада Шаҳрисабз кўчасидан Олой бозорига томонга ҳаракатланувчи автотранспортлар оқимининг сезиларли даражада камайишига хизмат қилиши лозим.
Яқин кунларда ўтган йил июль ойида ёпилган Сайрам кўчасининг 7-тор кўчаси билан кесишган қисмининг (Давлат статистика қўмитаси биноси олида) ҳам очилиши кутилмоқда. Бу эса шу атрофда яшовчи фуқароларнинг ишга ва уйга қатнашидаги масофани бир неча километрга қисқартиришга имкон туғдиради.
Бир вақтнинг ўзида Мустақиллик ва Оққўрғон кўчалари кесишмасидаги чорраҳанинг очилиши бўйича ҳам ишлар бошлаб юборилди. Ўтган йил августида бу ерда қарама-қарши томонга ҳаракатланишни бутунлай чеклайдиган тўсиқлар ўрнатилган эди.
Қурилиш ишларида иштирок этаётганлар турли йилларда ёпилган бошқа кўчаларнинг ҳам очилишини истисно этмади.
Изоҳ (0)