29-sentabr kuni Tojikiston prezidenti Emomali Rahmon Dushanbe shahriga ishchi tashrif bilan kelgan O‘zbekiston Tashqi ishlar vaziri Abdulaziz Kamilovni qabul qildi. Bu haqda Tojikiston Respublikasi Prezidenti rasmiy saytida xabar berildi.
Bo‘lib o‘tgan suhbatda tomonlar tojik-o‘zbek aloqalarining hozirgi holati va istiqbollarini muhokama qildi, ularni yanada kengaytirish yo‘llarini ko‘rib chiqdi.
Bugungi kunda ikki mamlakat hamkorligining madaniy-gumanitar tarkibini kuchaytirishga bo‘lgan real ehtiyoj qayd etildi. Tomonlar dolzarb mintaqaviy va xalqaro muammolarni muhokama qilib, Markaziy Osiyodagi ijtimoiy-siyosiy barqarorlikning asosiy sharti sifatida mintaqaviy xavfsizlikni ta’minlash ahamiyatiga e’tibor qaratdi.
Iqtisodiy va savdo hamkorligi darajasini oshirish eng muhim masala sifatida belgilab olindi. Shuningdek, suv-energetika va transport-logistika sohalari konstruktiv hamkorlik qilish talab etiladigan yo‘nalishlar sifatida qayd etildi.
Izoh (0)