UzReport телеканали футбол бўйича Европада янги мавсум стартидан бошлаб Англия Премьер-Лигаси, Европа Чемпионлар Лигаси ва Европа Лигаси ўйинларини намойиш этади.
Телеканал Европа Чемпионлар Лигаси ва Англия Премьер-Лигаси ўйинлари трансляциясининг эксклюзив ҳуқуқини қўлга киритган. Яъни, Ўзбекистон ҳудудига фаолият олиб бораётган бошқа телеканаллар мазкур мусобақаларни намойиш эта олмайди.
Янги мавсумдан бошлаб эса UzReport нуфузи жиҳатдан Европада иккинчи рақамли клублар мусобақаси бўлган Европа Лигаси ўйинларини ҳам намойиш этади. Бу ҳақда телеканалнинг «Спорт» бўлими бош муҳаррири Ёқубжон Бобожонов маълумот берди.
Англия Премьер-Лигаси ва Европа Чемпионлар Лигаси ўйинларининг трансляцияси борасида UzReport 3 йиллик келишувга эришган. Ўтган мавсум келишувнинг бир йили ортда қолди.
Бобожоновнинг сўзларига кўра, жорий мавсумдан бошлаб деярли барча марказий ўйинлар намойиш этилиши мумкин. Ўтган мавсумда эса Чемпионлар Лигасининг битта туридаги — сешанба ва чоршанба кунларидан 1 донадан ўйин намойиш қилинганди.
Ҳафтанинг жума кунини инобатга олмаганда, қолган олти кунда UzReport футбол учрашувларини трансляция қилади. Сешанба ва чоршанба кунлари Европа Чемпионлар Лигаси, пайшанба куни Европа Лигаси, шанба, якшанба ва душанба кунларида эса Англия Премьер-Лигаси ўйинлари мухлислар учун тақдим этилади.
Изоҳ (0)