Футзал бўйича ЖЧ—2016 иштирокчилари. Колумбия: футзал оламидаги сенсацион янги куч

Жорий йилнинг 10 сентябрь — 1 октябрь кунлари Колумбияда футзал бўйича жаҳон чемпионати баҳслари бўлиб ўтади. Мусобақада Ўзбекистон миллий терма жамоаси ҳам иштирок этади ва бу ўзбек футзалчиларининг мундиаллардаги илк иштироки бўлади.

Мусобақани батафсил ёритиб боришни режалаштираётган «Дарё» интернет-нашри бугундан эътиборан жаҳон чемпионати иштирокчиларини таништириб боради. Дастлаб — мезбонлар ҳақида.

Қандай қилиб мусобақа мезбонига айланган?

Мусобақа мезбонлиги учун дастлаб, Колумбиядан ташқари, яна беш мамлакат — Франция, Эрон, Пуэрто-Рико, Испания ва Чехия даъвогарлик қилган эди. Охир-оқибат, кураш фақат икки мамлакат — Колумбия ва Чехия ўртасида давом этиб, 2013 йилнинг 28 май куни ФИФА Ижроия қўмитаси мусобақа Жанубий Америкада ўтишини эълон қилди.

Қуръа натижаларига кўра, Колумбия ЖЧ—2016 гуруҳ босқичида 2016 йилги Европа чемпионатининг чорак финалчиси Португалия, 2016 йилги Шимолий Америка вице-чемпиони Панама ва 2016 йилги Осиё вице-чемпиони Ўзбекистон терма жамоаларига қарши баҳс олиб боради. Колумбия — Ўзбекистон учрашуви 13 сентябрь кунига белгиланган.

Кучли томонлари

Осмар Фоннегра қўл остидаги Колумбия терма жамоаси халқаро футзалда ўзини мутлақо янги куч сифатида ўзини намоён қилиб улгурган. «Қаҳва етиштирувчилар» буни жаҳон чемпионати йўлланмалари ўйналган 2015 йилги Копа Америкада, ЖЧ—2016 мезбони бўлса-да, 4-ўринни эгаллагани, 2005 йилдан бери ҳар йили Бразилияда ташкил этиладиган футзал Гран-присида 3-ўринни банд этгани билан яна бир карра исботлай олди.

«Реал Букараманга» шарафини ҳимоя қилувчи Анжелло Каро ва «Рионегро» ўйинчиси Жонатан Торо каби тўрт йил аввал Таиландда ўтган ЖЧ—2012 да ростмана порлаган фахрий футболчилар ҳозир ҳам терма жамоанинг ҳақиқий зарбдор кучлари ҳисобланади. Бундан ташқари, Юлиан Диас ва Луис Поведа каби янги номлар бўлажак жаҳон чемпионатида, хусусан, Ўзбекистон миллий терма жамоаси учун ҳам жиддий бошоғриқ бўлиши тайин.

Аввал ҳам футзал бўйича жаҳон чемпионатларида қатнашганми?

Колумбия бунгача фақат бир марта — 2012 йили Таиланд залларида ўтган жаҳон чемпионатида иштирок этган ва дебютдаёқ ҳаммани лол қолдиришга муваффақ бўлган. Ўз гуруҳида 2-ўринни эгаллаган колумбияликлар нимчорак финалда Осиё гранди Эронни, чорак финалда эса Европа вакили Украинани мағлуб этиб, фақат ярим финалда бразилияликларга мағлуб бўлган.

3-ўрин учун ўйинда Италияга йирик ҳисобда имкониятни бой берган бўлса-да, Колумбия 2012 йилги жаҳон чемпионатининг ҳақиқий сенсациясига айланган эди.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.