Германия канцлери Ангела Меркель Forbes журнали томонидан ҳар йили тузиб бориладиган дунёнинг энг нуфузли аёллари рейтингида биринчиликни сақлаб қолди. Меркель рейтинг чўққисини олти йилдан буён ҳеч кимга бермай келяпти, деб таъкидлайди «РБК».
Иккинчи ўринни, 2015 йилда бўлганидек, АҚШнинг собиқ давлат котиби Ҳиллари Клинтон забт этди. АҚШ Федерал захира тизими раҳбари Жанет Йеллен Bill & Melinda Gates Foundation хайрия жамғармаси ҳамраиси, миллиардер Билл Гейтснинг рафиқаси Мелинда Гейтсни учинчи ўриндан сиқиб чиқарди — Гейтс хоним жорий йилда тўртинчи қатор билан қаноатланишга мажбур бўлди.
Кучли ўнликка, шунингдек, General Motors автоконцерни бош директори Мэри Барра, Халқаро валюта жамғармаси раҳбари Кристин Лагард, Facebook операцион директори Шерил Сандберг, YouTube бош директори Сьюзен Войчицки, Hewlett-Packard бош директори Мэг Уитман ва Santander Group директорлар кенгаши раиси Анна Патрисия Ботин кирди.
АҚШнинг биринчи хоними Мишель Обама 13-қаторда қолиб кетди.
Жорий йилги рейтингдан 20 нафар янги ном ўрин олди. Улар орасида Lens Technologies бош директори Чжоу Кунфей бор (61-қатор) — Forbes уни технологик компанияга асос солган энг бой аёл деб ҳисобламоқда (унинг 6 июнь ҳолатига кўра бойлиги 8,4 миллиард долларни ташкил этмоқда).
Ўз навбатида, шоу-бизнеснинг бир қанча машҳур вакиллари, жумладан, хонанда Тейлор Свифт ва актриса Анжелина Жоли рейтингдан чиқиб кетди.
Шунингдек, Theranos биотехнологик стартапи асосчиси, ўтган йили 72-поғонани эгаллаб турган Элизабет Холмс ушбу йил рейтингга киритилмади. 1 июнь куни Forbes унинг илгари 4,5 миллиард долларга баҳоланган бойлиги айни пайтда амалда нолга тенглигини маълум қилди.