ОАВ: Мишель Платини ФИФАнинг янги санкцияларига тушиб қолмаслик учун Евро–2016 га ташриф буюрмайди

Европа футбол ассоциациялари иттифоқи (УЕФА) президенти Мишель Платини Францияда бўлиб ўтадиган Европа чемпионатига ташриф буюмайди. Бу ҳақда DPA’га таяниб, «ТАСС» хабар бермоқда.

Аввалроқ Франция футбол федерацияси Мишель Платинини Европа чемпионатига таклиф қилиш истагини билдирган эди.

Манбанинг таъкидлашича, Платини ФИФА ташкилотининг Аҳлоқ қўмитаси томонидан қўлланиши мумкин бўлган янги санкциялардан чўчимоқда. Платинининг сўзларига кўра, у УЕФА раҳбари лавозимини 14 сентябрь куни, ташкилотнинг Афинада бўлиб ўтадиган конгрессида тарк этади.

• УЕФАга янги президент тайинлангунга қадар Мишель Платини ташкилот раҳбари бўлиб қолади

Франциялик мутасадди 2007 йилдан буён УЕФАни бошқариб келмоқда. 2011 йилда ФИФА собиқ президенти Йозеф Блаттер Мишель Платинига 2 миллион Швейцария франкини ноқонуний равишда ўтказиб бергани учун 2015 йилнинг декабрь ойида саккиз йилга ҳар қандай футбол фаолиятидан четлаштирилганди. Кейинчалик ушбу четлаштириш олти йилга қисқартирилди. Шундай сўнг, Платини Лозаннадаги (Швейцария) Спорт арбитраж суди (CAS)га четлаштириш муддатини қисқартириш бўйича апелляция берди. Унинг апелляцияси қисман қондирилди – дисквалификация муддати олти йилдан тўрт йилгача, жарима миқдори 80 мингдан 60 минг еврогача қисқарди.

Эслатиб ўтамиз, Евро–2016 турнири 10 июндан 10 июлга қадар бўлиб ўтади.