Тошкент давлат техника университети қайтадан ташкил қилинади

Абу Райҳон Беруний номидаги Тошкент давлат техника университети (ТДТУ) келаси ўқув йилидан бошлаб иккита янги факультет — Муҳандислик тизимлари факультети ва Муҳандислик-физика факультетини очади, дея хабар бермоқда «Газета.uz» Ўзбекистон президентининг ОТМ фаолиятини янада такомиллаштириш ҳақидаги қарори (pdf)га таяниб.

Ҳужжатда ТДТУ республиканинг муҳандислик-техника йўналишлари бўйича олий маълумотли кадрлар тайёрлаш соҳасидаги базавий олий таълим муассасаси ҳисобланиши белгилаб қўйилди.

ТДТУ Нефть ва газ факультети талабалари контингенти И.М.Губкин номидаги Россия нефть ва газ давлат университетининг Тошкент шаҳридаги филиалига ўтказилади.

Университетнинг давлат раҳбари қарори билан тасдиқланган янги ташкилий тузилмаси, шунингдек, Машинасозлик технологиялари факультети, Муҳандислик геологияси ва тоғ иши факультети ва Энергетика факультетини ўз ичига олади.

Бунгача ТДТУда етти: Механика-машинасозлик, Геология ва тоғ иши, Авиация, Электроника ва автоматика, Энергетика, Нефть ва газ ҳамда Саноат соҳаларидаги бошқарув факультетлари фаолият олиб борар эди.