Abu Rayhon Beruniy nomidagi Toshkent davlat texnika universiteti (TDTU) kelasi o‘quv yilidan boshlab ikkita yangi fakultet — Muhandislik tizimlari fakulteti va Muhandislik-fizika fakultetini ochadi, deya xabar bermoqda “Gazeta.uz” O‘zbekiston prezidentining OTM faoliyatini yanada takomillashtirish haqidagi qarori (pdf)ga tayanib.
Hujjatda TDTU respublikaning muhandislik-texnika yo‘nalishlari bo‘yicha oliy ma’lumotli kadrlar tayyorlash sohasidagi bazaviy oliy ta’lim muassasasi hisoblanishi belgilab qo‘yildi.
TDTU Neft va gaz fakulteti talabalari kontingenti I.M.Gubkin nomidagi Rossiya neft va gaz davlat universitetining Toshkent shahridagi filialiga o‘tkaziladi.
Universitetning davlat rahbari qarori bilan tasdiqlangan yangi tashkiliy tuzilmasi, shuningdek, Mashinasozlik texnologiyalari fakulteti, Muhandislik geologiyasi va tog‘ ishi fakulteti va Energetika fakultetini o‘z ichiga oladi.
Bungacha TDTUda yetti: Mexanika-mashinasozlik, Geologiya va tog‘ ishi, Aviatsiya, Elektronika va avtomatika, Energetika, Neft va gaz hamda Sanoat sohalaridagi boshqaruv fakultetlari faoliyat olib borar edi.
Izoh (0)