Лука Тони карьерасидаги сўнгги голи билан «Ювентус»нинг 26 турлик мағлубиятсиз сериясини йўққа чиқарди

Футбол бўйича Италия А сериясининг 37-турида Туриннинг «Ювентус» клуби мағлубият аламини тотиб кўрди. Муддатидан аввал чемпионлик масаласини ҳал этган Массимилиано Аллегри жамоаси, А серия билан муддатидан аввал хайрлашган «Верона» майдонида имкониятни бой берди.

Мазкур беллашув 26 май куни 40 ёшни қарши оладиган машҳур италиялик ҳужумчи Лука Тони учун карьерасидаги сўнггиси эди. Учрашувнинг 43-дақиқасида айнан Тони пенальтидан ҳисобни очиб берди ва бу гол «Верона»нинг ғалабасига ҳисса қўшди.

Маълумот учун, Тони жорий мавсум «Верона» сафида 23 та ўйин ўтказиб, 6 та гол уришга эришди. Бир йил муқаддам эса 22 та гол уриб, А серия тўпурарлигини қўлга киритганди.

Италия А сериясида кумуш медаллар масаласи сўнгги турда ҳал бўлади. Бу йўлда кураш олиб бораётган «Наполи» ва «Рома» клублари 37-турда зафар қучди. «Рома» ўз майдонида «Кьево»ни йирик ҳисобда мағлуб этган бўлса, «Наполи» Туриндан ғалаба билан қайтди.

Сўнгги турда қандай натижа қайд этилса ҳам, Миланнинг «Интер» клуби 4-ўринда қолади. Халқаро майдонга йўлланма берувчи кейинги икки поғонадан бири «Фиорентина»га насиб қилади. Яна битта йўлланма учун «Милан» ҳамда «Сассуоло» клублари кураш олиб боради.

37-турнинг энг қизиқарли ўйини «Карпи» майдонида бўлиб ўтди. Бош ҳакам «Лацио» дарвозасига иккита пенальти тайин қилганидан ташқари, римликларнинг 2 та ўйинчисини майдондан четлатди. Шунга қарамай, меҳмонлар сафардан ғалаба билан қайтди.

Лига дебютанти ҳисобланган «Фрозиноне» битта мавсумнинг ўзидаёқ А серия билан хайрлашди. Қуйи лигага равона бўладиган учинчи клуб номига 38-турда ойдинлик киритилади. «Палермо» ҳисобида 36, «Карпи»да 35 очко бор. Сўнгги турда «Палермо» ўз майдонида «Верона»ни қабул қилса, «Карпи» сафарда «Удинезе» меҳмони бўлади.

Италия А серияси 37-тур беллашувлари 9 май, якшанба

«Интер» — «Эмполи» 2:1

Голлар: Мауро Икарди, 12 (1:0). Мануэль Пуччарелли, 37 (1:1). Иван Перишич, 40 (2:1).

«Болонья» — «Милан» 0:1

Гол: Карлос Бакка, 40-пен (0:1).Четлатиш: Амаду Диавара, 12 (Б).

«Рома» — «Кьево» 3:0

Голлар: Ража Найнгголан, 18 (1:0). Антонио Рюдигер, 39 (2:0). Миралем Пянич, 85 (3:0).

«Карпи» — «Лацио» 1:3

Голлар: Милан Бишевац, 23 (0:1). Антонио Кандрева, 32 (0:2). Мирослав Клозе, 73 (0:3). Жерри Мбакогу, 84 (1:3).Ноаниқ пенальтилар: Жерри Мбакогу, 12 (К). Жерри Мбакогу, 41 (К).Четлатишлар: Лукас Билья, 83 (Л). Филип Жоржевич, 90 (Л).

«Фиорентина» — «Палермо» 0:0

«Фрозиноне» — «Сассуоло» 0:1

Гол: Маттео Политано, 85 (0:1).

«Торино» — «Наполи» 1:2

Голлар: Гонсало Игуаин, 12 (0:1). Хосе Кальехон, 20 (0:2). Бруно Перес, 66 (1:2).Четлатиш: Жузеппе Вивес, 90+2 (Т).

«Верона» — «Ювентус» 2:1

Голлар: Лука Тони, 43-пен (1:0). Федерико Вивиани, 55 (2:0). Пауло Дибала, 90+4-пен (2:1).Четлатиш: Алекс Сандро 90+2 (Ю).