Luka Toni karyerasidagi so‘nggi goli bilan “Yuventus”ning 26 turlik mag‘lubiyatsiz seriyasini yo‘qqa chiqardi

Futbol bo‘yicha Italiya A seriyasining 37-turida Turinning “Yuventus” klubi mag‘lubiyat alamini totib ko‘rdi. Muddatidan avval chempionlik masalasini hal etgan Massimiliano Allegri jamoasi, A seriya bilan muddatidan avval xayrlashgan “Verona” maydonida imkoniyatni boy berdi.

Mazkur bellashuv 26-may kuni 40 yoshni qarshi oladigan mashhur italiyalik hujumchi Luka Toni uchun karyerasidagi so‘nggisi edi. Uchrashuvning 43-daqiqasida aynan Toni penaltidan hisobni ochib berdi va bu gol “Verona”ning g‘alabasiga hissa qo‘shdi.

Ma’lumot uchun, Toni joriy mavsum “Verona” safida 23 ta o‘yin o‘tkazib, 6 ta gol urishga erishdi. Bir yil muqaddam esa 22 ta gol urib, A seriya to‘purarligini qo‘lga kiritgandi.

Italiya A seriyasida kumush medallar masalasi so‘nggi turda hal bo‘ladi. Bu yo‘lda kurash olib borayotgan “Napoli” va “Roma” klublari 37-turda zafar quchdi. “Roma” o‘z maydonida “Kyevo”ni yirik hisobda mag‘lub etgan bo‘lsa, “Napoli” Turindan g‘alaba bilan qaytdi.

So‘nggi turda qanday natija qayd etilsa ham, Milanning “Inter” klubi 4-o‘rinda qoladi. Xalqaro maydonga yo‘llanma beruvchi keyingi ikki pog‘onadan biri “Fiorentina”ga nasib qiladi. Yana bitta yo‘llanma uchun “Milan” hamda “Sassuolo” klublari kurash olib boradi.

37-turning eng qiziqarli o‘yini “Karpi” maydonida bo‘lib o‘tdi. Bosh hakam “Latsio” darvozasiga ikkita penalti tayin qilganidan tashqari, rimliklarning 2 ta o‘yinchisini maydondan chetlatdi. Shunga qaramay, mehmonlar safardan g‘alaba bilan qaytdi.

Liga debyutanti hisoblangan “Frozinone” bitta mavsumning o‘zidayoq A seriya bilan xayrlashdi. Quyi ligaga ravona bo‘ladigan uchinchi klub nomiga 38-turda oydinlik kiritiladi. “Palermo” hisobida 36, “Karpi”da 35 ochko bor. So‘nggi turda “Palermo” o‘z maydonida “Verona”ni qabul qilsa, “Karpi” safarda “Udineze” mehmoni bo‘ladi.

Italiya A seriyasi 37-tur bellashuvlari 9-may, yakshanba

“Inter” — “Empoli” 2:1

Gollar: Mauro Ikardi, 12 (1:0). Manuel Puchcharelli, 37 (1:1). Ivan Perishich, 40 (2:1).

“Bolonya” — “Milan” 0:1

Gol: Karlos Bakka, 40-pen (0:1).Chetlatish: Amadu Diavara, 12 (B).

“Roma” — “Kyevo” 3:0

Gollar: Raja Naynggolan, 18 (1:0). Antonio Ryudiger, 39 (2:0). Miralem Pyanich, 85 (3:0).

“Karpi” — “Latsio” 1:3

Gollar: Milan Bishevats, 23 (0:1). Antonio Kandreva, 32 (0:2). Miroslav Kloze, 73 (0:3). Jerri Mbakogu, 84 (1:3).Noaniq penaltilar: Jerri Mbakogu, 12 (K). Jerri Mbakogu, 41 (K).Chetlatishlar: Lukas Bilya, 83 (L). Filip Jorjevich, 90 (L).

“Fiorentina” — “Palermo” 0:0

“Frozinone” — “Sassuolo” 0:1

Gol: Matteo Politano, 85 (0:1).

“Torino” — “Napoli” 1:2

Gollar: Gonsalo Iguain, 12 (0:1). Xose Kalexon, 20 (0:2). Bruno Peres, 66 (1:2).Chetlatish: Juzeppe Vives, 90+2 (T).

“Verona” — “Yuventus” 2:1

Gollar: Luka Toni, 43-pen (1:0). Federiko Viviani, 55 (2:0). Paulo Dibala, 90+4-pen (2:1).Chetlatish: Aleks Sandro 90+2 (Y).