Қозоғистоннинг Павлодар шаҳрида бокс бўйича ўсмирлар ўртасидаги Осиё чемпионатида ўзбекистонлик боксчилар муваффақиятли иштирок этиб, 3 та олтин, 3 та кумуш ва 3 та бронза медалини қўлга киритди ва умумжамоа ҳисобида иккинчи ўринни эгаллади. Бу ҳақда «Sports.uz» хабар бермоқда.
-60 килограмм вазн тоифасида рингга кўтарилган Ўзбекистон вакили Билолбек Мирзараҳимов финалда ҳиндистонлик Даҳия Анкушга ҳеч қандай имконият қолдирмай, Ўзбекистон термаси ҳисобига илк олтин медални тақдим этди. Шунингдек, -69 килограмм вазнда Улуғбек Собиров финал жангида қозоғистонлик Олег Матвейчукни 2:1, -81 килограмм вазнда Санжар Турсунов ҳиндистонлик Реял Пурини 3:0 ҳисобида мағлуб этиб, олтин медалларга сазовор бўлди.
Финал жангларининг энг енгил, -49 килограмм вазнда ўзбекистонлик боксчилардан Отабек Холматов мезбонлар вакили Василий Самчукка 1:2, -91 килограмм вазнда Шоҳруз Раҳимов қозоғистонлик Дмитрий Ахтсигерга 1:2, +91 килограмм вазнда Абдулла Худорганов қозоғистонлик Нурдувлат Уланулига 0:3 ҳисобида мағлуб бўлди ва кумуш медални қўлга киритди.
«Sports.uz»нинг маълум қилишича, аввалроқ Шунқор Абурасулов (-56 кг), Зиёдбек Ўролов (-64 кг) ҳамда Шоҳруҳ Рустамов (-75 кг) бронза медалларига сазовор бўлган эди.
Изоҳ (0)