АҚШ ғазначилиги 2020 йилда банкнотлар дизайнини ўзгартиради. Бу йил аёлларга тенг сайлов ҳуқуқини кафолатлаган мамлакат конституциясига 19-қўшимча кучга кирганига 100 йил тўлади, шу боис купюраларда аёлларга кенг ўрин берилган. Бу ҳақда «РБК» хабар бермоқда.
Ўн долларлик банкнотларнинг ортида «Туйғулар декларацияси» муаллифи Элизабет Стэнто, собиқ қул Сожорнер Трут, фаоллардан Лукреция Мотт ва Сьюзен Энтони, шунингдек, президент Вудро Вилсонни аёлларга сайлов ҳуқуқини бериш тўғрисида қарор қабул қилишга мажбур этган ташвиқот ташаббускори Элис Пол сиймолари пайдо бўлади. 20 долларли банкнотнинг юз томонидан эса Фуқаролар урушигача ва уруш давомида мингдан ортиқ қуллар озод этилишига эришган афроамерикалик Гарриет Табмен сурати жойлаштирилади.
Беш долларли банкнот қора танли хонанда аёл Мариан Андерсоннинг 1939 йили Линкольн мемориалида бўлиб ўтган концертига бағишланди. Уни ташкил этган президент Франклин Рузвельтнинг рафиқаси Элеоноранинг тасвири ҳам янгиланган купюрадан ўрин олади.
Изоҳ (0)