15 апрель, жума куни Ўзбекистон Республикаси Ташқи ишлар вазирлигида халқаро (ер усти) транспорт алоқаларини ривожлантириш ва ягона транспорт дипломатиясини илгари суриш масалалари бўйича идоралараро ишчи гуруҳнинг навбатдаги мажлиси бўлиб ўтди. Бу ҳақда вазирлик матбуот хизмати хабар бермоқда.
Тадбирда Ташқи иқтисодий алоқалар, инвестициялар ва савдо вазирлиги, Адлия вазирлиги, Давлат божхона қўмитаси, Ўзбекистон автомобиль ва дарё транспорти агентлиги, Ўзбекистон Халқаро автомобилда юк ташувчилар уюшмаси, «Ўздавтемирйўлназорат» давлат инспекцияси ва «Ўзбекистон темир йўллари» акциядорлик жамиятининг экспертлари иштирок этди.
Йиғилишда халқаро юк ўтказмаларини ривожлантириш, мамлакатнинг транзит салоҳиятини ошириш имкониятлари, мазкур соҳада халқаро шартномалар, жумладан, Марказий Осиё ва Форс кўрфази давлатлари ўртасида транспорт коридорини ташкил қилиш кўзда тутилган, Эрон, Уммон, Туркманистон ва Ўзбекистон Республикаси ўртасида имзоланган Ашхобод битимини амалга ошириш масалалари муҳокама қилинди.
Изоҳ (0)