15 апрель, жума куни Ўзбекистон Республикаси Ташқи ишлар вазирлигида Россия Федерацияси президентининг Шанхай ҳамкорлик ташкилоти ишлари бўйича махсус вакили Бахтиёр Хакимов билан учрашув бўлиб ўтди. Бу ҳақда вазирик матбуот хизмати хабар бермоқда.
Мулоқот давомида ШҲТ доирасидаги Ўзбекистон—Россия муносабатлари ва Ўзбекистоннинг ташкилотга раислиги даврида бўлиб ўтадиган тадбирлар кун тартиби юзасидан фикр алмашилди. ШҲТнинг кўп томонлама институтлари тизимида алоҳида ўрин тутадиган, 14 апрель куни ўз ишини якунлаган Хавфсизлик кенгашлари котиблари 11-учрашувининг самарали якунлари мамнуният билан қайд этилди.
Ўзбекистон ва Россия ШҲТда кўп тармоқли ҳамкорликни изчил ривожлантириш, июнь ойида Тошкентда бўлиб ўтиши режалаштирилган давлат раҳбарлари кенгашининг йиғилишини муваффақиятли ўтказиш ва мазмунан бойитиш, Уфада ўтказилган саммитда эришилган келишувлар, жумладан Ҳиндистон ва Покистонни ШҲТга қабул қилиш жараёнларини бошлаш тўғрисидаги қарорни амалга оширишдан бирдек манфаатдор ҳисобланиши таъкидланди.
Музокараларда Россиянинг Ўзбекистондаги Фавқулодда ва мухтор элчиси Владимир Тюрденев иштирок этди.
Изоҳ (0)