Ижтимоий тармоқларда ичида қизил доғи бор банан суратлари илова қилинган «ваҳимали хабарлар» фаол тарқатилди, тарқатилмоқда. Ёзишларича, бундай «бананларнинг ичи қон билан тўла», «шундай бананлар туфайли бир неча боланинг ичи бузилиб, касалхонага келтирилган». «Банан сотиб олманг!», — деб қатъий огоҳлантираётган хабар муаллифларининг таъкидлашича, бундай бананлар ОИТС ва гепатит B вирусларини ташийди.
Фото: «Одноклассники»
Ростдан ҳам банан орқали ОИТС ва гепатит B юқиши мумкинми?
Йўқ. ОИТС ва гепатит B фақат қон орқали юқади. Ўзбекистон Давлат санитария-эпидемиология назорати маркази бош врачи ўринбосари Нуриддин Тошбоевнинг «Даракчи» газетасига маълум қилишича, «ижтимоий тармоқларда тарқалган, мазкур касалликларнинг банандан юқиши борасидаги фикрлар асоссиз». Сабаби, инфекциянинг юқиши учун шароит бўлиши керак — банан ва бошқа мева гепатит B ёки ОИТС касалликларининг қўзғатувчилари билан зарарлантирилган ҳолда ҳам, у ерда вирус ривожланадиган муҳит йўқлиги сабаб нобуд бўлади.
Ўзбекистонда бўлмаса ҳам, бошқа бирор жойда кимдир шу касалликларни банан орқали юқтиргандир балки?
Одамлар банандан ОИТСни юқтириб олиши мумкинлиги ҳақидаги миш-мишлар яқин хориж мамлакатларида деярли ҳар йили пайдо бўлади. Масалан, 2014 йили Қозоғистонда ОИТС нафақат банандан, балки апелсиндан ҳам юқиши ҳақида гап-сўзлар тарқатилган, 2015 йили Қирғизистон Соғлиқни сақлаш вазирлиги аҳоли орасида ваҳимани босиш учун банан орқали ОИВ юқиши имкони йўқлиги ҳақида баёнот берган, миш-мишлар Чеченистонгача етиб борган. Унинг келиб чиқиш тарихи эса Буюк Британияга бориб тақалиши ҳақида бу ерда ўқишингиз мумкин.
Ўзи мева-чева орқали бирор касаллик юқадими?
Ҳа, юқиши мумкин. Масалан, меваларни ювмасдан истеъмол қилганда юқумли ичак касалликларининг қатор турлари билан зарарланиш мумкин. Айниқса, ифлосланган сув орқали гепатитнинг А тури юқиши эҳтимоли мавжуд.
Изоҳ (0)