Мадриднинг «Реал» жамоаси раҳбарияти клуб ҳужумчиси Криштиану Роналду билан хайрлашишга тайёр, деб хабар беради «Чемпионат».
Испаниялик машҳур журналист Гильем Балагенинг Sky Sports нашри саҳифасида маълум қилишича, «Қироллик клуби» президенти Флорентино Перес португалиялик ҳужумчини 60 миллион евро эвазига сотиб юборишга тайёр. Ҳозирда Роналдунинг агентлари оптимал ечим топиш мақсадида «Реал» билан музокаралар ўтказмоқда. 31 ёшли футболчининг ўзи эса уни сотиб олмоқчи бўлган клуб сафида йилига 20—25 миллион евро маош олишга даъвогарлик қиляпти.
Роналдунинг хизматларига «Манчестер Юнайтед» ва «ПСЖ» клублари қизиқиш билдирмоқда. Футболчининг ўзи мавсум давомида бир неча бор ўзининг келажаги борасида ноаниқ баёнотлар қилганди.
Эслатиб ўтамиз, Роналдунинг қайсарлиги «Реал» президенти Флорентино Переснинг жонига теккани ҳақида хабар берилган эди.