Бугун,

  • USD 10940.05
  • RUB 182.26
  • EUR 11121.65

Украина президенти Пётр Порошенко Украина футбол федерацияси президенти, терма жамоа бош мураббийи ва 9 нафар футболчига ўқотар қурол тақдим этган. «Украински Новини» хабарига кўра, бу ҳақда Украина президенти томонидан 2015 йил 21 ноябрида имзоланган, бироқ шу вақтга қадар эълон қилинмаган фармонда сўз боради.

Фото: «Украински новини»

Фото: «Украински новини»

Ўқотар қурол мураббий ва футболчиларга футбол бўйича Украина терма жамоасининг 2016 йил Францияда бўлиб ўтадиган футбол бўйича Европа чемпионатига йўл олганликлари муносабати билан тақдим этилган.

Шахсий ўқотар қуроллар УФФ президенти Андрей Павелко, терма жамоа бош мураббийи Михаил Фоменко, Киевнинг «Динамо» клуби футболчилари Олег Гусев, Евгений Хачериди, Андрей Ярмоленко, Донецкнинг «Шахтёр» клуби аъзоларидан Андрей Пятов ҳамда Вячеслав Шевчук, Днепропетровскнинг «Днепр» жамоаси вакиллари Руслан Ротан ва Артём Федецкий, шунингдек, терма жамоа етакчилари ҳисобланган Евгений Селезнёв ҳамда Анатолий Тимошукка топширилган.

Хабар беришларича, Пётр Порошенко ҳамда Украина термаси футболчилари ўртасида 2015 йил 22 ноябрида бўлиб ўтган учрашув ҳақида ёзар экан, президент матбуот хизмати футболчи ва мураббийларга «эсдалик совғалари» топширилганини қайд этган эди.

Қайд этишларича, Украина президенти маъмурияти ўқотар қурол билан тақдирланганлик тўғрисидаги ҳужжатларни ошкор этишни маъқуллаган мамлакатдаги ягона давлат органидир. Мамлакат ички ишлар вазири Арсен Аваков ва мудофаа вазири Степан Полторак нафақат бу борадаги, балки ўқотар қурол билан тақдирланганлар рўйхатининг ҳам ошкор этилишига қарши бўлган.

«Украински Новини» нашрининг қайд этишича, совға сифатида тақдим этиладиган ўқотар қуроллар давлат ҳисобидан сотиб олинади, шу сабабли ИИВ раҳбари ва мудофаа вазирининг қаршилиги «Очиқ ахборотдан фойдаланиш тўғрисида»ги қонун талабларини қўпол равишда бузиш ҳисобланади.

Изоҳ
Асосий янгиликлар