Ukraina prezidenti Pyotr Poroshenko Ukraina futbol federatsiyasi prezidenti, terma jamoa bosh murabbiyi va 9 nafar futbolchiga o‘qotar qurol taqdim etgan. “Ukrainski Novini” xabariga ko‘ra, bu haqda Ukraina prezidenti tomonidan 2015-yil 21-noyabrida imzolangan, biroq shu vaqtga qadar e’lon qilinmagan farmonda so‘z boradi.
O‘qotar qurol murabbiy va futbolchilarga futbol bo‘yicha Ukraina terma jamoasining 2016-yil Fransiyada bo‘lib o‘tadigan futbol bo‘yicha Yevropa chempionatiga yo‘l olganliklari munosabati bilan taqdim etilgan.
Shaxsiy o‘qotar qurollar UFF prezidenti Andrey Pavelko, terma jamoa bosh murabbiyi Mixail Fomenko, Kiyevning “Dinamo” klubi futbolchilari Oleg Gusev, Yevgeniy Xacheridi, Andrey Yarmolenko, Donetskning “Shaxtyor” klubi a’zolaridan Andrey Pyatov hamda Vyacheslav Shevchuk, Dnepropetrovskning “Dnepr” jamoasi vakillari Ruslan Rotan va Artyom Fedetskiy, shuningdek, terma jamoa yetakchilari hisoblangan Yevgeniy Seleznyov hamda Anatoliy Timoshukka topshirilgan.
Xabar berishlaricha, Pyotr Poroshenko hamda Ukraina termasi futbolchilari o‘rtasida 2015-yil 22-noyabrida bo‘lib o‘tgan uchrashuv haqida yozar ekan, prezident matbuot xizmati futbolchi va murabbiylarga “esdalik sovg‘alari” topshirilganini qayd etgan edi.
Qayd etishlaricha, Ukraina prezidenti ma’muriyati o‘qotar qurol bilan taqdirlanganlik to‘g‘risidagi hujjatlarni oshkor etishni ma’qullagan mamlakatdagi yagona davlat organidir. Mamlakat ichki ishlar vaziri Arsen Avakov va mudofaa vaziri Stepan Poltorak nafaqat bu boradagi, balki o‘qotar qurol bilan taqdirlanganlar ro‘yxatining ham oshkor etilishiga qarshi bo‘lgan.
“Ukrainski Novini” nashrining qayd etishicha, sovg‘a sifatida taqdim etiladigan o‘qotar qurollar davlat hisobidan sotib olinadi, shu sababli IIV rahbari va mudofaa vazirining qarshiligi “Ochiq axborotdan foydalanish to‘g‘risida”gi qonun talablarini qo‘pol ravishda buzish hisoblanadi.
Izoh (0)