Тошкент ҳокимлиги Тараққиёт кўчасидан (эски ТошМИ)дан бошланиб, Тошкент механика заводи орқали Оҳангарон йўлига қадар давом этувчи трамвай йўли қурилишидан воз кечди. «Газета.uz» хабарига кўра, 11 март, жума куни 13-трамвай йўналиши қисқартирилганидан сўнг Тараққиёт кўчасида ажралиб қолган трамвай йўли бўлагидаги рельсларни олиб ташлаш ишлари бошланган.
1 август куни 13-трамвайнинг «Тошкент» вокзалидан ТТЗга қадар давом этувчи қисми ёпилганидан сўнг, «Тошшаҳартрансхизмат» компанияси шаҳар чеккасидаги «Роҳат» бекатига қадар давом этадиган, ҳозирда фойдаланилмаётган 5 километрлик йўл билан боғланувчи янги 3 километрлик трамвай йўли қурилиши режаларини эълон қилганди.
7 август куни автотранспорт воситалари учун Паркент кўчасидан Мустақиллик шоҳ кўчасига кириш ёпилди. Бу ҳолат Тараққиёт кўчасидаги, айниқса, темирйўл ва автомобиль йўллари кесишган нуқталардаги ҳаракат фаоллигини янада оширди. «Кўринишидан, трамвай йўлларини бузиш йўлдаги юкламаларни камайтириш йўлидаги ягона чора бўлган», — деб ёзади «Газета.uz».
Трамвай йўли қурилиши борасидаги режаларнинг ўзгариши бўйича расмий ахборот берилмаган. Демонтажда иштирок этаётган қурувчиларнинг сўзларига кўра, бу ерда гап рельсларни янгилаш эмас, балки айнан олиб ташлаш ҳақида бормоқда. Айни вақтда, Оҳангарон йўлига қадар автойўл қуриш режаси ўз кучида қолган. Маълумотларга кўра, эски ТошМИ атрофида трамвай ҳалқаси қурилади.
Изоҳ (0)