Болливуд ёш актрисаларни афзал кўриши маълум. Илгари бош ролдаги актриса турмушга чиқса, дарҳол ҳисобдан чиқариларди. Агар актриса 30 ёшга кирса, унга холалар ва оналар даражасидаги роллар берилган. Болливуд актрисаларининг “яроқлилик муддати” ҳар доим актёрларникидан бир неча баравар кам бўлган.
Аммо бугунги кунда вазият аста-секин ўзгармоқда ва бир вақтлар машҳур бўлган қаҳрамонлар шоу-бизнесга қайтмоқда. Минакши Шешадрининг Ҳиндистонга қайтиши бунга ёрқин мисолдир. 80 йилларнинг ўрталаридан 90 йилларнинг бошигача Минакши Болливуддаги энг кўп маош олувчи актриса ва раққосалардан бири бўлган. Ҳозир у 60 ёшда, фильмларда рол ўйнаш учун эри ва болаларини АҚШда қолдириб, ўзи Ҳиндистонга келди.
Менакшининг ўзи бу ҳақда шундай дейди: Мен 28 йилдан бери кинода рол ўйнаганим йўқ. Бу ўттиз йилни таътил деб ҳисобланг. Мен аллақачон фитна назариялари айлана бошлаганини ҳис қиляпман.
Одамлар мендан қайта-қайта ажрашдингми, деб сўрашяпти. Мен ҳар доим ёпиқ одам бўлганман, ҳатто турмушга чиққанимда ҳам. Шунинг учун шахсий ҳаётимга бегоналарнинг киришига йўл қўймайман.
Улар нима дейишса, деяверсин. Мен кинода 16 йил ишладим. Менинг ватанимга қайтиш қароримни оилам қўллаб-қувватламоқда. Фарзандларим ва эрим АҚШда яшаяпти, мен Ҳиндистонга кўчиб ўтдим. Лекин вақти-вақти билан уларни кўргани Америкага бориб тураман ёки улар бу ерга келишади. Ҳамиша болаларим улғайиб, мустақил бўлишлари биланоқ Ҳиндистонга қайтишимни орзу қилганман.
Ҳозир қизим 25 ёшда, ўз иши бор. Ўғлим эса коллежда ўқийди.
Бу кутилмаган қарор эмасди. Шоу-бизнесга, рақсга ва актёрликка бўлган муҳаббатимни болаларим ҳар доим билишарди. Америкада рақсдан дарс бердим ва кўплаб тадбирларда қатнашдим. Ҳозир 60 ёшдаман ва ҳаммасини нолдан бошламоқчиман.
Ҳиндистонга қайтгач, эски танишларим, режиссёрлар, продюсерлар ва актёрлар олдига иш излаб югурмадим. Дўстларим менга агентлик билан шартнома тузиб, карьерамни бошқаришга рухсат беришимни маслаҳат беришди. Агентлик потенциалимни қаерда ишлатишни ҳали ҳам яхши билади: ОТТ, реалити-шоулар, спектакллар ёки рақслар.
Аммо кўплаб агентликлар мени бир сабабга кўра рад этишди — менда ижтимоий тармоқлар йўқ эди. Ҳозирда шартнома тузишнинг асосий шарти ижтимоий тармоқларда кўплаб обуначилар бўлиши экан. Шунинг учун ўзимнинг онлайн мавжудлигимни ривожлантиришга эътибор қаратишга қарор қилдим ва Instagram’да аккаунт очдим.
Бугун ўтган йиллар актрисалари учун катта имкониятлар очилмоқда. Қизиқарли контент яратилмоқда ва ОТТ платформалари ривожланмоқда. Улар шунчаки фильмларда рол ўйнамайди, бренд яратади. Анушка Шарма продюсер бўлганида, у биринчилардан бўлди. Унинг узоқни кўра олиши мени ҳайратда қолдирди.
Менга ёқмайдиган ягона нарса бу — троллар. Аммо қўлимиздан ҳеч нарса келмас экан. Улар менга нималарни ёзишмади-я! Кинога қайтишимни ўрта ёшдаги инқироз ва шунга ўхшаш нарса дейишди: Сен ҳеч қачон Мадҳури бўла олмайсан, деб ёзишди.
Улар юзимни ўзгартиришни маслаҳат беришди — мени арвоҳ ва ажиналарга ўхшатишди, мени кампир деб аташди ... Лекин мен фақат бир нарсани биламан — ҳаммаси мен ҳақимда эмас, балки улар ҳақида. Уларнинг фикрлашлари ҳақида. Мен бундай одамлардан узоқлашаман. Агар бошқаларнинг фикрига кўра яшасам, бу муаммога айланади.
Мен ўзимни яхши кўраман ва қадримни етарлича баҳолай оламан. Одамлар фақат аёлларни ғийбат қилишади, чунки улар биздан кўп нарса кутишади. Иш ҳақида гапирадиган бўлсак, яқин олти ой ичида қандайдир қизиқарли лойиҳани имзолашим мумкинлигини ҳис қиляпман.
Изоҳ (0)