Нигина Абдураимова Австралиядаги теннис турнирининг жуфтликлар баҳсини ҳам тарк этди

Ўзбекистонлик истеъдоли теннисчи Нигина Абдураимова Австралиянинг Порт-Пири шаҳрида якунига етиб бораётган ITF туркумидаги теннис турнирининг жуфтликлар баҳси ярим финалида мағлубиятга учради.

Халқаро теннис федерациясининг маълум қилишича, мусобақанинг жуфтликлар баҳси финал йўлланмаси учун кечган учрашувда 20 ёшли чехиялик Барбора Стефкова билан тандем ҳосил қилган 21 ёшли Абдураимова мезбон теннисчилар Кейси Делаква ва Эшли Бартига қарши кортга чиқди. Унда 6:2, 6:0 ҳисоби қайд этилиб, австралиялик жуфтлик фойдасига ҳал бўлди.

Эслатиб ўтамиз, Абдураимова/Стефкова жуфтлиги илк учрашувда япониялик Кёка Окамура ва хитойлик Ран Тиан жуфтлиги устидан 6:3, 6:3 ҳисобида ғалаба қозонган бўлса, чорак финалда  Чи-Ю Су (Хитой Тайпейи)/Шанель Симмондс (ЖАР) дуэтини 7:5, 6:2 ҳисобида таслим этилганди.

Яккалик баҳсларида ҳам иштирок этган Нигина Абдураимова иккинчи даврада австралиялик Жессика Мурга қарши баҳс олиб бориб, 4:6, 6:7 ҳисобида имкониятни бой берган.

Маълумот учун, Nyrstar Port Pirie Tennis International мусобақасининг соврин жамғармаси 25 минг АҚШ долларини ташкил қилади.