«Мажнун» фильми: режиссёр Жаҳонгир Аҳмедов Улуғбек Қодировнинг премьерага келмаслиги, «видеоқароқчилар» ва фильм ҳақида

Яқин вақт ичида режиссёр Жаҳонгир Аҳмедовнинг «Мажнун» фильми катта экранларга чиқиши кутилмоқда. Фильм тақдимоти арафасида унинг атрофида можаро юзага келди — «Мажнун»да бош ролни ижро этган Улуғбек Қодиров фильм премьерасига бормаслигини Instagram’даги саҳифаси орқали эълон қилди. Унинг бу баёнотига жавобан Жаҳонгир Аҳмедов: «Бу иккимиз ўртамиздаги муаммо, ўзаро ҳал қилиб оламиз», — қабилида изоҳ қолдирган.

Журналист Феруз Муҳаммад режиссёр ва актёр ўртасида юзага келган тушунмовчиликка аниқлик киритиш ва умуман фильм ҳақида батафсил маълумот олиш мақсадида, Жаҳонгир Аҳмедов билан суҳбатлашди.

— Улуғбек Қодиров нима демоқчи бўлганига ўзи жавоб бериши керак. Мен ҳали у билан юзма-юз гаплашмадим, балки орамиздан премьерага келмайдиган даражада бирор нарса ростдан ҳам ўтгандир. Аммо премьерага келмаслигига ишонгим келмайди. Чунки «Мажнун» унинг ҳам катта умид боғлаган фильми эканлигини биламан. Кейин, бу гап-сўзлар — фильмолди сохта пиар ҳам эмас. Тўғриси, ҳали пиар ҳақида ўйлашга ҳам имкони бўлгани йўқ, — деди Жаҳонгир Аҳмедов.

Улуғбек Қодировнинг «Мажнун»даги иштироки ҳақида

«Олдиндан огоҳлантиришган эди: ‘Улуғбек Қодиров билан ишлаш қийин, баъзида тасвирга олиш майдончасига келмайди, келса ҳам кечикади’. Мен бош ролда Улуғбекни кўрганим учун, унга мурожаат қилдим. Сценарий унга жуда маъқул келди. Бирор марта съёмкага кеч келганини, келмаганини, сўзини ёдламаганини эслай олмайман. У фильм олиниши учун энг катта жонбозлик кўрсатган актёрлардан бири бўлди. От миниш лавҳаларида мен: ‘Каскадёрдан фойдаланайлик, эҳтиётсизлик қилмайлик’, — деганимда Улуғбек: ‘Менга бир ой вақт беринглар’, — деди ва шу вақт мобайнида от минишни ўрганиб, от билан боғлиқ саҳналарда ҳам ўзи ўйнади. Овозлаштириш жараёнида ҳам муаммога дуч келмадик. У ҳақида эшитган гапларимни ўзига айтганимда: ‘Яхши сценарий бўлса, маза қилаётган бўлсанг, қандай қилиб суратга олиш майдончасига келмаслик мумкин?!’, — деб жавоб қайтарган эди».

Актёрлар жамоаси, сифат даражаси, савия ҳақида

«Замонавий ҳам сифатли фильм суратга олиш учун нима керак бўлса, ҳаммаси қилинди. Улуғбек Қодиров, Асал Шодиева, Матёқуб Матчонов, Раъно Зокирова, Муҳаммадисо Абдулхаиров, Элёр Носиров, Раъно Шодиева сингари актёрлар жамоаси йиғилган. Актёрлар таркибидан тортиб, операторлик иши, монтаж, гримчилар, техника, либосчилар, рассомлар масаласида ҳам алоҳида иш олиб борилди. Фильмга катта маблағ сарфланган, гонорар масаласида муаммо бўлгани йўқ, лекин, очиғи, мен молиявий масалаларга аралашмайман, бу томони продюсерларга ҳавола».

Матёқуб Матчонов ва Муҳаммадисо Абдулхаировнинг иштироки ҳақида

«Матёқуб Матчонов ва Муҳаммадисо Абдулхаиров ‘Мажнун’ фильмида умуман кутилмаган — важоҳатли, оғир, тўпори одамлар образини яратган. Уларга хос комедик унсурларни ‘Мажнун’да кўрмайсиз, улар 100 фоиз ўзгарган. Дубляж жараёнида улар ўзларини кўриб: ‘Бу актёрларни қаердан оляпсизлар?’, деган ҳазиллар ҳам қилишди».

«Видеоқароқчилар»га қарши чоралар ҳақида

«‘Барон’ билан юз берган ҳолат мен учун катта дарс бўлди. Авваллари ўзим билан ҳам шундай ҳодисалар бўлган — ‘Тундан тонггача – 2’, ‘Тилим қурсин – 2’ фильмлари ҳали кинотеатрларда намойиш этилаётган вақтда, ‘видеоқароқчилар’ томонидан бозорларга чиқариб юборилган. Томошабинлардан фильмларни ‘видеоқароқчилар’нинг қўлидан олиб кўрмасликни сўраб қолардим. Томошабин киноижодкордан сифатли фильм ишлашни талаб қиляптими, унинг талабини бажарганларга ҳам муносиб жавоб қайтарсин. Катта маблағ тикиб, катта жамоа билан ишлаётган режиссёрлар бор, қилинган меҳнатнинг қадрига етиш керак.

Премьера қачон?

«Ҳозирги вақтда фильмнинг сўнгги сайқал бериш ишлари давом этмоқда. Картина кўрик учун ‘Ўзбеккино’ Миллий агентлигига топширилган, премьера учун деярли тайёр. ‘Мажнун’ — хусусий киностудиялар орасида энг узоқ вақт суратга олинган фильм бўлди, чамамда. Ҳар бир кадр устида узоқ вақт фикр юритилган, фильмнинг нуқта, вергулларигача аҳамият берилган».