Алишер Навоий кинотеатри «Барон» фильмидан кейин ўриндиқларни кўпайтиришга қарор қилди
«Kinorama.uz» нашри Алишер Навоий номли киносарой директори ўринбосари Ҳусниддин Эргашев билан суҳбат ўтказди. Интервью чоғида директор ўринбосари «Барон» фильмининг киносаройда намойиш этилиши билан боғлиқ баъзи тафсилотларни айтиб ўтди.
«Киносаройга 3200 нафар одамни бирдан қабул қила оламиз. ‘Барон’ фильмидан кейин бу ҳам кам эканлигига амин бўлдик. Залларимиздаги ўриндиқлар сонини кўпайтиришни ҳаётнинг ўзи тақозо қилиб қўйди. Ўша кунлари ‘Барон’ фильми учун 8000 дан ортиқ одамларни қабул қилдик, ундан ташқари 700 га яқин томошабин фильмни кўрмасдан уйларига қайтишга мажбур бўлди. Уларга тўғри тушунтириб, кейинги кунга келишини илтимос қилдик», — деди у.
Эргашевнинг сўзларига кўра, «Барон» фильми ҳали ҳам томошабин кириши жиҳатидан киносаройдаги олд фильмлардан бири ҳисобланади.
«Тарбиявий аҳамияти кучли бўлгани учун ҳам бу фильм ҳалигача залларимизда намойиш қилинмоқда. Аммо видеоқароқчилар томонидан тарқатилгани томошабинларнинг кескин камайишига сабаб бўлди», — дея қўшиб қўйди у.
Эслатиб ўтамиз, режиссёр Рустам Саъдиевнинг янги — «Барон» номли фильмининг Алишер Навоий номли киносарой («Панорама»)даги намойишларига 24 январь куни 7,5 минг томошабин келган эди.
Аввалроқ Алишер Навоий номли киносарой директори ўринбосари «Барон» фильмининг қўлга чиқиб кетишига киносаройнинг алоқаси йўқлигини маълум қилган эди.
