5 февраль куни Тошкент шаҳридаги Халқаро Вестминстер Университетининг 14 йиллиги муносабати билан хайрия концерти ўтказилди. «Эзгулик наволари» хайрия концерти ТХВУда 2012 йилдан буён ўтказилиб келинмоқда. Бу ҳақда Университет матбуот хизмати «Дарё»га хабар бермоқда.
Хайрия концерти Университетнинг 14 йиллигини нишонлашга бағишланган бўлиб, у Old Jazz мавзусига оид эди. Университет таваллудига бағишланган анъанавий концерт дастурлари талабаларнинг маънавий ва маданий таълим тарбиясига йўналтирилган бўлиб, ташкилотчилар концерт мавзуси учун ҳар йили маълум бир мусиқа йўналишига эътибор қаратади. Бу йилги концерт учун эса ўз даврининг гўзаллигини қамраб олган жазз йўналиши танланди.
5 февраль кунининг байрам концерти дастури университетнинг истеъдодли талабаларининг ёрқин чиқишлари билан бир қаторда, Ўзбекистон халқ артисти Мансур Тошматов, «Зўр-зўр стар» танлови ғолиби Улуғбек Холиқов ва Россия «Голос.Дети» телетанлови ғолиби Сабина Мустаева ижросида жазз композициялари янграб ўтди.
Бу йилги хайрия концертида ТХВУ ва лицейи талабалари орқали йиғилган барча маблағлар лейкемияга чалинган болаларни даволаш учун йўналтирилди.
Тошкент шаҳридаги Халқаро Вестминстер Университети (ТХВУ) 2002 йил 16 январь, Лондон шаҳридаги Вестминстер Университети (Буюк Британия) ва Ўзбекистон Республикаси Президентининг «Умид» жамғармаси билан ҳамкорликда ташкил қилинган. ТХВУ Марказий Осиёдаги халқаро тоифадаги аккредитациядан ўтган биринчи университетдир. 14 йил мобайнида Университетни 1700 дан ортиқ талаба тамомлади.
Изоҳ (0)