Театрга кечикаётган Аль Пачинони мухлислар уйсиз дайди билан адаштириб қўйди

Театрга шошаётган Аль Пачино Нью-Йорк кўчалари бўйлаб машиналар оқими орасидан чопиб ўтди. Актёрни таниш бирмунча мушкул эди: у шу ҳолатида Голливуд юлдузидан кўра кўпроқ уйсиз кимсани эслатарди, дея ҳикоя қилади «Вести».

Кўзигача тушган капюшон, беўхшов қора пальто, қўлидаги ичи тўлалигидан беркилмаётган катта қора сумка ва кроссовкада актёр кўпроқ дайдига ўхшарди. «Чўқинтирган ота» фильми юлдузи капюшонни ечганда ва патила сочи, пешонасидаги қора лентани намойиш этганда, бу ўхшашлик янада кучайди.

Аль Пачино Бродвейда «Хитойлик қўғирчоқ» спектаклида роль ўйнамоқда, у айнан навбатдаги томошага кечикаётганди. Унинг театр атрофида пайдо бўлишини мухлислар сабрсизлик билан кутаётган эди. Бундай қиёфа билан актёр улар орасидан кўзга ташланмай ўтиб кетмоқчи бўлганми ёки шошиб шундай кийинганми, бунга аниқлик киритилмаган.