Аслида сохта бўлиб чиққан машҳур фотосуратлар

Техника тараққиётининг чексиз афзалликлари билан бирга, афсуски, ўзига яраша салбий жиҳатлари ҳам бор. Масалан, PhotoShop дастури орқали ҳар ким исталган суратга ўзича безак бериб, сохталаштириши мумкин.

Мана шундай қайта ишланган баъзи суратларнинг сохталиги яққол сезилиб турса-да, уларда ҳақиқат кўрсатилган, деб ишонадиган кишилар ҳали ҳамон топилади. «Антиприунил» шундай фотосуратлар жамланмасини тайёрлади.

Қора шер

Суратни тарқатаётганлар бу сайёрадаги ягона қора шерлиги, у ноёб генетик мутация ҳосиласи экани ҳақида сафсата сотади. Аслида Ерда ҳали ҳеч ким қора шерни кўрмаган, суратдаги шер эса аслида альбинос бўлиб, у ҳақиқатан ҳам камёб.

Айиқдан қочаётган фотосуратчилар

Машҳур фотосуратлардан яна бири — суратчилар гуруҳи ўрмондан чиқиб келган айиқдан қочмоқда. Айиқнинг ўзини-да катталаштириб кўрилса ҳам, фотомонтаж белгилари очиқчасига кўриниб қолади. Агар яхшилаб изланса, интернетда шу айиқнинг ҳақиқий суратини ҳам топиш мумкин.

1918 йилги нашахўрлик

Ҳақиқатан ҳам суратда шундай манзара акс этган. Бироқ бу ҳақиқий нашахўрлик эмас, аксинча, франциялик режиссёр Жорж Ремоннинг «Dandy-Pacha» номли овозсиз фильмидан олинган лавҳа.

Қор остида қолган Сфинкс

Фотосурат Қоҳирада 112 йилда биринчи марта қор ёққанидан сўнг интернетда кенг тарқалиб кетган. Тарқатувчиларнинг сўзларига кўра, суратда — Мисрдаги Сфинкс. Аслида эса у Япониядаги Tobu World Square хиёбонида олинган.

Капотдаги сигир

Одатда бу сурат Ғарб сайтларида «ақлсиз русларнинг яна бир ҳунари» қабилидаги хабарларда пайдо бўлади. Лекин унинг турган-битгани фотомонтаж бўлиб, сигирнинг ҳақиқий суратини Google орқали қийинчиликсиз топиш мумкин.

Анголадаги гигант ўргимчак

Бу жаҳондаги энг катта ўргимчакнинг сурати эмиш. Лекин хавотирга ўрин йўқ — табиатда бундай йирик ўргимчаклар йўқ, ҳозиргача учраган энг катта ўргимчак ҳам одам кафтидан ортиқ эмас. Ўргимчакнинг ҳақиқий сурати билан қуйида танишинг:

Бирга гитара чалаётган Жон Леннон ва Че Гевара

Жон Леннон Куба инқилоби етакчиларидан бири билан бирга куй чалиб ўтиришига ишонасизми? Ишонмай тўғри қиласиз. Чунки Ленноннинг қаршисида Че Гевара эмас, Elephant’s Memory гуруҳи вакили Уэйн Габриэл бўлган.

Фудзи тоғи узра кўтарилган булутлар

Афсонага кўра, Япониядаги Фудзи тоғи устида бир сафар шундай булутлар пайдо бўлган. Тан олиш керак, бу булутлар жуда чиройли, қўшимчасига, лентикуляр булутлар қаватма-қават бўлиши ҳам мумкин. Лекин айнан шу суратдаги каби ҳолат суратдаги жойда ҳеч бўлмаган.