Ўзбекистон Миллий олимпия қўмитаси ташкил топганлигига 24 йил тўлди

Ўзбекистон Миллий олимпия қўмитаси (МОҚ) 1992 йил 21 январь куни ташкил топган ва ўтган давр мобайнида мамлакатда спорт ва Олимпия ҳаракатини ривожлантириш ишида фаол бўлиб келмоқда. Бу ҳақда Ўзбекистон Миллий олимпия қўмитаси матбуот хизмати хабар беради.

Ўзбекистон Миллий олимпия қўмитаси 1993 йил сентябрь ойида Халқаро олимпия қўмитаси (ХОҚ) томонидан расман тан олингач, ўзбекистонлик спортчилар мустақил Ўзбекистон номидан тўрт йилликнинг энг нуфузли мусобақаси — қишки ва ёзги Олимпиада ўйинларида иштирок этиш ҳуқуқига эга бўлди.

Ўзбекистон Миллий олимпия қўмитаси 24 йилдирки Ўзбекистонда жисмоний тарбия ва спортни ривожлантириш орқали жамиятда соғлом турмуш тарзини қарор топтириш, Олимпия ҳаракати ва олимпизм ғояларини кенг тарғиб этиш йўлида фаол иш олиб бормоқда. Ҳар йили спортчи ва мураббийлар билим ва тажрибасини янада юксалтириш мақсадида МОҚ ташаббуси билан халқаро семинарлар, илмий-амалий конференциялар, минтақавий форумлар ташкил этилмоқда. Бу ҳам, ўз навбатида, халқаро спорт майдонларида қўлга киритилаётган муваффақиятлар салмоғини йил сайин юксалишида алоҳида аҳамият касб этмоқда.

Ўзбекистонлик спортчилар учун давлат томонидан қаратилаётган алоҳида эътибор ва яратилган шарт-шароитлар спорт оламининг энг йирик мусобақасида қўлга киритилаётган муваффақиятларга ҳам замин яратмоқда. Истиқлол йилларида беш марта (1996 йил Атланта (АҚШ), 2000 йил Сидней (Австралия), 2004 йил Афина (Греция), 2008 йил Пекин (Хитой) ва 2012 йил Лондон (Буюк Британия) шаҳарларида бўлиб ўтган) ёзги ва олти маротаба (1994 йил Лиллихаммер (Норвегия), 1998 йил Нагано (Япония), 2002 йил Солт-Лейк-Сити (АҚШ), 2006 йил Турин (Италия), 2010 йил Ванкувер (Канада), 2014 йили Сочи (Россия) шаҳарларида ўтказилган) қишки Олимпия ўйинларида Ўзбекистон шарафини ҳимоя қилган спортчилар жами 6 та олтин, 5 та кумуш ва 10 та бронза медалига сазовор бўлди.