Номини ошкор этмаган ва спортдаги фаолиятини давом эттираётган чилилик теннисчи келишилган ўйинларда иштирокини тан олди. Спортчи Чили теннис федерациясига ёзган очиқ мактуб ташкилот сайтида эълон қилинган.
Теннисчи профессионал теннисчилар ассоциациясининг (ATP) «Фьючерс» ва «Челленжер» туркумидаги турнирларида мунтазам қатнашишини маълум қилган.
«Илк натижаларга эришаётган пайтларимда олдимга бир киши келиб, ‘Фьючерс’нинг биринчи раундидаги мағлубият учун 1,5 минг доллар таклиф этди. Мен рози бўлмадим ва ўйинда ғолиб чиқдим. Орадан бир ҳафта ўтиб, ўша одамнинг ўзи энди 2 минг доллар таклиф қилди. Мен ютқаздим, 117 доллар мукофот пули олдим, бироқ чўнтагимда 2 минг доллар бор эди», — дейилади мазкур мактубда.
Эслатиб ўтамиз, олдинроқ Show Legend портали сўнгги 10 йил давомида халқаро теннис рейтингида кучли 50 таликдан жой олиб, теннисдаги келишилган ўйинларда қатнашгани гумон қилинаётган 16 нафар теннисчининг исмини ошкор этди. Улар орасида Ўзбекистоннинг биринчи рақамли ракеткаси Денис Истомин ҳам борлиги айтилмоқда.
Изоҳ (0)