Дававианазорат: Ўзбекистон самолётлари бортида электрон қурилмалардан фойдаланиш мумкин

Ўзбекистон Республикаси Парвозлар хавфсизлигини назорат қилиш давлат инспекцияси Йўловчининг ҳаво кемаси ичидаги юриш-туриш қоидаларига киритилган ўзгартиришни изоҳлади, деб ёзади «Review.uz».

Янгиланган қоидаларга кўра, Ўзбекистон Миллий авиакомпанияси самолётлари йўловчиларига юриш, кўтарилиш ва қўниш вақтида фотосуратга ва видео тасвирга олиш тақиқланган эди.

Инспекция аниқлик киритишича, фотосурат ва видеотасвирлар фуқаролик авиациясига ноқонуний равишда аралашув билан боғлиқ фаолият (терроризм ва ҳ.к.)да қўлланилиши мумкинлиги, шунингдек, самолёт бортида туриб, суратга олиш мумкин бўлмаган объектларни расмга тушириш мумкинлигига асосланиб, ушбу тақиқ жорий этилган.

Шу билан бирга, Дававианазорат таъкидлашича, Ўзбекистон лайнерлари бортида парвоз чоғида турли электрон қурилмалардан фойдаланишга рухсат берилади. Ноутбук, планшет, электрон китоблар ўқиш учун мўлжалланган қурилмалар, мобил ўйин девайслари ва бошқалар ўз мақсадида қўлланилиши мумкин. Бироқ уларни юриш, кўтарилиш ва қўниш вақтида ишлатиш, шунингдек, улардан фотоаппарат ёки видеокамера сифатида фойдаланиш тақиқланади.