Швециянинг West Atlantic компаниясига тегишли почта самолёти 8 январь, жума кунига ўтар кечаси ҳалокатга учради. Осло аэропортидан Норвегиянинг Тромсё шаҳрига учаётган самолёт қулаб тушгандан сўнг, Швециянинг шимоли-ғарбидаги Норвегия билан чегарага яқин жойдан топилди. Бу ҳақда «РИА Новости» хабар беради.
Швеция радиосининг маълум қилишича, Аккайауре кўли яқинидан топилган самолёт бортида икки киши бўлган. Швеция қутқарувчилари ҳалокат ҳақидаги сигнални маҳаллий вақт бўйича 00:30 да қабул қилди.
Ҳалокат сабаблари ҳозирча номаълум. Учиш ҳудудида об-ҳаво шароитлари яхши бўлган.
Самолётдан фақат кичик бўлаклар қолган. Самолёт бортидаги одамлар ҳақида ҳозирча маълумот йўқ. Швеция ОАВлари уларни бедарак йўқолган деб қайд этмоқда. Қулаб тушган самолётнинг маркаси Canadair CRJ 200 бўлган.