ОАВ: 113-кимёвий элемент «японий» деб аталиши мумкин

Менделеев даврий жадвалидаги 113-кимёвий элементни яратган олимлар номи келгуси йил январида эълон қилинади. Бу ҳақда «ТАСС» хабар бермоқда.

«Санкэй» газетасининг маълум қилишича, муаллифлик Япония табиий фанлар институти олимларига тақдим этилган тақдирда, мазкур элемент «японий» деб аталади. Муаллифликка Россия ва АҚШ мутахассислари ҳам даъво қилмоқда. Бироқ, нашрнинг таъкидлашича, назарий ва амалий кимё (IUPAC) ҳамда физика (IUPAR) халқаро уюшмалари бирлашган комиссиясига япониялик олимлар ўтказган синтез ишончлилиги Россия ва АҚШ мутахассислари ишидан кўра юқорироқ эканлиги билдирилган маъруза тақдим этилган.

113-элемент илк бор 2003 йили, Россия ва АҚШ олимлари 115-элемент синтези бўйича ўтказган тажрибалар чоғида «қўшимча элемент» сифатида олинганди. Бироқ бу ихтиро IUPAC томонидан тан олинмаган. Япон олимлари 113-элементни тезлаткичда висмут ва рух реакциясини ўрнатиш орқали олишга ҳаракат қилган ва натижада уч марта: 2004, 2005 ҳамда 2006 йилларда синтезлашга муваффақ бўлган. Бу кашфиёт тан олиниши учун олимлар реакцияни мустақил лабораторияда такрорлашига тўғри келади.