«Юлдузлар жанги» фильми намойиши чоғида АҚШдаги кинотеатр эвакуация қилинди
«Юлдузлар жанги» фильмининг премьера намойиши чоғида ёнғин тревогаси туфайли Лос-Анжелесдаги кинотеатрни юзлаб кишилар тарк этишга мажбур бўлди, дея хабар бермоқда «РИА Новости».
Ҳодиса кинотеатр жойлашган Grove савдо-кўнгилочар марказида содир бўлди. 17 декабрь, пайшанба куни фантастик фильм намойиши бошланганидан 30 дақиқа ўтиб, у тўхтатиб қўйилди. Савдо маркази ходимлари кўчада тўпланиб қолган одамларга хавфсизлик нуқтаи назаридан уйларига тарқалишни тавсия қилди.
Воқеа жойига ўт ўчирувчилар етиб келди. Текшириш чоғида ёнғин сиренаси тугмасини кимдир билмасдан босиб юборгани маълум бўлди. Сал ўтиб, кинотеатр томошабинларга эшикларини очди.
14 декабрь, душанба куни Лос-Анжелесда «Юлдузлар жанги: Кучнинг уйғониши» фильмининг ёпиқ премьераси бўлиб ўтди. Фильм АҚШ киноэкранларига расман 18 декабрь куни чиқади.
