Ислом Каримов ташаббуси билан жорий йилнинг 5—6 ноябрь кунлари Тошкентда ўтказилган Халқаро инвестициявий форум «Ўзбекистон темир йўллари» акциядорлик жамияти тизимидаги корхоналарни модернизациялаш, янги ишлаб чиқариш қувватларини ташкил этиш, тармоққа хорижий инвесторларни янада кенг жалб этишда муҳим аҳамиятга эга бўлди, дея хабар бермоқда ЎзА.
Инвестициявий форум доирасида «Ўзбекистон темир йўллари» акциядорлик компанияси хорижлик инвесторлар билан умумий қиймати қарийб 53 миллион долларлик англашув меморандумлари ва шартномалар имзолади.
Форум доирасида «Ўзбекистон темир йўллари» акциядорлик жамияти билан Хитой Халқ Республикасининг XSMG компанияси ўртасида «Урганч экскаватор заводи» акциядорлик жамиятининг 44,4 фоиз улушини сотиб олиш юзасидан англашув меморандуми имзоланди. Айни пайтда «Ўзбекистон темир йўллари» мутахассислари хитойлик инвесторлар билан ахборот алмашинувини йўлга қўйган.
«Ўзбекистон темир йўллари» ва Франциянинг Alstom компанияси билан асинхрон тортишли электр двигателлари, Германиянинг Teichmann Group компанияси билан юк кўтариш машиналари кранлари ва механизмларини модернизация қилиш, тиклаш ва ишлаб чиқаришни йўлга қўйиш юзасидан имзоланган меморандумларга мувофиқ мазкур инвестиция лойиҳалари Тошкент механика заводи базасида амалга оширилади.
Ҳозирги кунда инвестиция лойиҳаларини амалга ошириш бўйича ишчи гуруҳлари ташкил этилган бўлиб, 2016 йилда инвестиция лойиҳаларининг лойиҳа-смета ҳужжатларини ишлаб чиқиш, бино ва иншоотларни реконструкция қилиш, муҳандислик-транспорт коммуникацияларини улаш, қўшма корхона ташкил қилиш бўйича ҳужжатларни тайёрлаш ва битим имзолаш кўзда тутилган.
«Ўзбекистон темир йўллари» акциядорлик жамияти ва испаниялик ишлаб чиқарувчилар ўртасида яна иккита Talgo русумидаги поездни харид қилиш юзасидан шартнома имзоланди.
Изоҳ (0)