Абонентларга узлуксиз ва сифатли алоқа хизматларини кўрсатиш бўйича қабул қилаётган қарорлари етарли бўлмагани сабаб, Ucell ва Beeline’га нисбатан чора кўрилди. Бу ҳақда Алоқа ахборотлаштириш ва телекоммуникация технологиялари соҳасида назорат бўйича давлат инспекцияси матбуот хизмати маълум қилди.
Хабар беришларича, инспекция томонидан Ўзбекистон ҳудудида мобил алоқа хизматларини кўрсатишда йўл қўйилаётган камчиликларни бартараф этиш юзасидан 4 та мобил алоқа операторларига келгусида тармоқни ривожлантириш бўйича тегишли чоралар кўрилишига эътибор қаратишлари юзасидан кўрсатмалар берилган.
«Бироқ Unitel (Beeline савдо белгиси остида хизмат кўрсатади) ва Coscom (Ucell савдо белгиси остида хизмат кўрсатади) мобил алоқа компаниялар томонидан абонентларга узлуксиз ва сифатли алоқа хизматларини кўрсатиш бўйича ўз вақтида тезкор ва тўлақонли қарорлар қабул қилишда ҳамда радиоэлектрон воситалардан ноқонуний фойдаланишнинг олдини олиш бўйича кўрилаётган чоралар етарли даражада эмас», — дейилади инспекция ахборотида.
Инспекция мазкур компанияларга ўз фаолиятларидаги камчиликларни бартараф этиш ва мобил алоқа хизматларини кўрсатишда Ўзбекистон қонунлари ва норматив ҳужжатлари талабларига мувофиқ ишларни ташкил қилиш юзасидан тегишли кўрсатмалар берди.
Белгиланган талабларни бажарилишини таъминлаш мақсадида мобил алоқа хизматлари сифат кўрсаткичларини бузганликлари ва радиочастота ҳамда радиоэлектрон воситалардан ноқонуний фойдаланганликлари учун 2015 йил 27 ноябрда Beeline ва Ucell’нинг мансабдор шахсларига нисбатан Маъмурий жавобгарлик кодексининг 152-моддаси 1- қисми («Радиоэлектрон воситалар ва юқори частотали қурилмалардан фойдаланиш тартибларини бузиш») ва 153-моддаси («Алоқа хизматининг сифатига доир нормалар ва давлат тармоқ стандартларини бузиш») талабларига асосан маъмурий жазо чоралари қўлланилди.
Изоҳ (0)