2015 йилнинг 9 ойи давомида Тошкент шаҳар божхона бошқармаси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда салкам 800 та божхона қоидабузарликлари аниқланиб, қиймати 6 миллиард сўмдан ортиқ товар-моддий бойликлар далилий ашё сифатида олиб қўйилди. Бу ҳақда Тошкент шаҳар божхона бошқармаси Ахборот хизмати «Дарё»га хабар берди.
Жумладан, бошқарманинг «Тошкент-товар» ташқи иқтисодий фаолият божхона пости ходимлари томонидан Тошкент шаҳридаги «К.А.» корхонаси (мақолада ташқи иқтисодий фаолият иштирокчилари номлари ўзгартирилган) томонидан Хитойдан келтирилган «Ошхона анжомлари» товарлари унга тегишли йўл-юк кузатув ҳужжатлари ҳамда божхона юк декларацияси асосида божхона кўригидан ўтказиш давомида 114,5 миллион сўмдан ортиқ қийматдаги салкам 30 турдаги товарлар божхона декларациясида қайд этилмагани аниқланди.
Шунингдек, мазкур божхона постида «А.А.Т.» масъулияти чекланган жамияти (МЧЖ) номига келтирилган товарларни божхона кўригидан ўтказиш давомида божхона юк декларациясида қайд этилмаган қиймати салкам 136,4 миллион сўмлик турли хўжалик моллари тегишли ҳужжатларсиз олиб кирилганлиги фош қилинди.
«Арқ-булоқ» ТИФ божхона пости ходимлари «N.M.C.» МЧЖ томонидан товарларни ноқонуий равишда олиб киришга бўлган уринишларни фош қилди. Мазкур корхона номига келтирилган юклар ўрнатилган тартибда божхона кўригидан ўтказилганда, қиймати 250 миллион сўмлик салкам 50 турдаги «Автомобиль эҳтиёт қисмлари» божхона юк декларациясидан «тушиб» қолганлиги аниқланди.
«Чуқурсой» ТИФ божхона пости ходимлари Тошкентдаги «Q.G.L.» МЧЖ томонидан келтирилган юкларни божхона кўригидан ўтказиш давомида божхона юк декларациясида қайд қилинган кимёвий моддалардан ташқари тегишли ҳужжатлари бўлмаган қиймати 75 миллион сўмлик 62 турдаги турли халқ истеъмоли товарларига ҳам дуч келди.
Ҳозирда юқоридаги ҳолатлар юзасидан божхона текширувлари ва суриштирув ҳаракатлари давом эттирилмоқда.
Эслатиб ўтамиз, Ўзбекистон Республикасининг Маъмурий жавобгарлик тўғрисидаги кодексига биноан божхона чегараси орқали олиб ўтилаётган товарларни декларацияламаслик ёки нотўғри декларациялаш, яъни товарлар, уларнинг божхона режими ва бошқалар ҳақида божхона мақсадлари учун зарур бўлган, белгиланган ёзма, оғзаки ёки бошқа шаклдаги маълумотларни бермаслик ёхуд нотўғри маълумотлар бериш, агар жиноят аломатлари бўлмаса, фуқароларга товарларини мусодара қилиб, энг кам иш ҳақининг беш бараваридан ўн бараваригача, мансабдор шахсларга эса, етти бараваридан ўн беш бараваригача миқдорда жарима солишга сабаб бўлади.
Изоҳ (0)