Хитойнинг REX Global Entertainment холдинги 100 миллион доллар эвазига смартфонлар ишлаб чиқаришга ихтисослашган Yota Devices ширкатининг 64,9 фоиз акциясини сотиб олди. Бу ҳақда Meduza хабар бермоқда.
Yota Devices бош директори Владислав Мартиновнинг «РБК»га маълум қилишича, Telconet Capital фондининг эгалари — Сергей Адонев ва Алберт Авдолян Yota’даги ўз улушларини Хитой холдингига сотган.
Компаниянинг қолган улуши аввалги эгалари — «Ростех» давлат корпорацияси (25,1 фоиз) ва компания бошқарув аппаратида (10 фоиз) қолмоқда. Келишув шартларига кўра, компания акциядорлари REX Global’дан уларнинг улушини тўлиқ сотиб олишни сўрашга ҳақли.
Имзоланган шартнома шартларига кўра, биринчи босқичда REX Global смартфон ишлаб чиқарувчи Россия компаниясига 50 миллион доллар миқдорида сармоя киритади, мазкур маблағлар «YotaPhone 3 ва маҳсулотлар қаторини ишлаб чиқариш» учун йўналтирилади».
Ёта компаниясининг шўъбаси — Yota Devices 2011 йили Владислав Мартинов ва Денис Свердлов томонидан ташкил этилган. 2013 йил охирида компания бозорга YotaPhone смартфонини чиқарди. 2014 йил декабрида эса кейинги авлод — YotaPhone 2 сотувга чиқди.
YotaPhone қурилмалари Тайванда йиғилади, шунинг учун ҳам аксарият танқидчилар бундай смартфонлар «Россияники» деб аталишга ҳақли эмас, деб ҳисоблайди. YotaPhone асосчилари эса бу фикрга мутлақо қўшилмайди.
Изоҳ (0)