Чеченистон раҳбари Рамзан Қодиров Россия президенти Владимир Путин томонидан Давлат думасига муқаддас китобларни экстремистик деб топишни ман этиш тўғрисидаги қонун лойиҳаси киритилишини «тарихий ва муҳим қарор», деб атади. Бу ҳақда «Газета.ru» хабар бермоқда.
«Барча дин вакиллари ҳақида бирдек қайғурадиган ва Россиянинг кўп миллатли халқи қўллаб-қувватлаётган умуммиллий етакчигина шундай қарор қабул қилиши мумкин», — дея таъкидлаган Қодиров «ВKонтакте» ижтимоий тармоғидаги саҳифасида.
Россия президенти Давлат думасига Инжил, Қуръон ва бошқа муқаддас китоблар мазмун-моҳияти ҳамда улардан олинган иқтибосларни экстремистик материаллар деб топишни тақиқловчи қонун лойиҳасини киритди. Мазкур ҳужжат парламент томонидан кузги сессия охирига қадар кўриб чиқилиши мумкин.
Эслатиб ўтамиз, олдинроқ Рамзан Қодиров Россияда «Инжил, Қуръон ва Тавротга тегиниш тақиқланадиган» федерал қонун қабул қилинишига ишонч билдирган эди.
Изоҳ (0)