Бутунжаҳон бокс ташкилоти (WBO) раҳбарияти америкалик боксчи Флойд Мэйуэзерни 66,68 кг вазн тоифасидаги жаҳон чемпионлиги унвонидан маҳрум қилди, деб хабар беради «ТАСС».
3 май куни Менни Пакьяони мағлуб этган Мэйуэзер WBO, WBA ва WBC йўналишлари бўйича камарларни топширишини маълум қилганди. Шу сабабли WBO Тимоти Брэдли ва Жесси Варгас ўртасида бўшаб қолган камар учун чемпионлик жанги ўтказишга қарор қилди. Аммо кейинчалик Мэйуэзернинг вакиллари боксчи жаҳон чемпионлиги камарларини бўшатмаганини айтди. Ташкилот спортчига ўйлаб олиш учун вақт берди.
WBO қоидаларига кўра, спортчи бир вақтнинг ўзида бошқа версияларда ва бошқа вазн тоифаларида чемпионлик унвонига эга бўлолмайди. Мэйуэзерга 69,85 кг вазн тоифаларидаги WBC ва WBA камарларидан воз кечиш таклиф қилинганди. Бундан ташқари, америкалик боксчи Пакьяо билан ўтказган жангги учун WBO’га ҳозиргача 200 минг доллардан иборат воситачилик пулини тўлагани йўқ.
Шундай қилиб, 27 июнь куни Варгасни мағлуб этган Брэдли жаҳон чемпиони, деб эълон қилинди.