Аварияга учраган «Фукусима-1» АЭС оператори – TEPCO (Tokyo Electric Power Company) компанияси Фукусима префектурасида яшаш учун яроқсиз ҳолатга келган туманлардан кўчириб юборилган аҳолига 5 триллион иен (тахминан 40,6 миллиард доллар) товон пули тўлади, деб хабар беради «РИА Новости».
Яшаш учун яроқсиз деб топилган ҳудуддан 81 минг киши эвакуация қилинган. 50 минг киши ўз ихтиёри билан камроқ зарарланган ҳудудга кўчиб ўтганди, аммо радиация ошиши хавфи туғилганидан кейин улар бошқа ерларга кўчиб ўтишга қарор қилди. Уларнинг барчаси моддий ва маънавий зарарни қоплаш учун товон пули олиш ҳуқуқига эга бўлди. Май ойи охирига келиб TEPCO томонидан тўланган компенсация миқдори 4,96 триллион иен (тахминан 40,36 миллиард доллар)ни ташкил қилганди.
Бундан ташқари, ҳукумат томонидан компенсацияларни тўлаш ва TEPCO компанияси реакторларини демонтаж қилиш учун махсус ташкил қилинган Давлат корпорацияси 4,87 триллион иен (39,6 миллиард доллар) миқдорида мамлакатдан ёрдам пули олди.
2011 йил 11 мартида «Фукусима-1» атом электр станциясида юзага келган авария натижасида атмосфера ва денгизга радиация тарқалган. Радиация билан зарарланган ҳудудлардан 130 мингга яқин киши эвакуация қилинган. Авария оқибатларини батамом бартараф этиш, шу жумладан реакторларни қисмларга ажратишга 40 йил керак бўлади.
Изоҳ (0)