Ўзбекистон Миллий хавфсизлик хизмати матбуот маркази хабарига кўра, Миллий хавфсизлик хизмати ходимлари томонидан Тожикистондан Ўзбекистон ҳудуди орқали Россия Федерациясига йирик миқдорда наркотик воситаларини олиб ўтиш бўйича навбатдаги уринишга чек қўйилди. Бу ҳақда «Uz24.uz» хабар бермоқда.
Жумладан, тезкор маълумотни текшириш натижасида Қозоғистон билан чегарадош бўлган Тошкент вилояти ҳудудидаги тўхташ масканларидан бирида Қозоғистон орқали Россияга ўтиши керак бўлган Mercedes русумли юк машинаси текширувдан ўтказилди.
Якуний манзили Бошқирдистон Республикасининг Уфа шаҳри бўлган юк машинаси текширувдан ўтказилган чоғда автомобилнинг бензин бакига ўрнатилган «махфий жой»дан умумий оғирлиги 50 килограмм бўлган 50 қадоқ героин топилди.
Экспертларнинг фикрича, «ҳалокатли юк» Россиядаги истеъмолчиларга муваффақиятли тарзда етказиб берилганда у деярли 500 мингта бир марталик гиёҳвандлик дозасини тайёрлашга етарли бўлар эди.
Қўлга олинган юк машинаси ҳайдовчиларидан бирининг айтишича, ушбу «ҳалокатли юкнинг» эгаси унинг таниши, Тожикистон фуқароси Тўлқинҳожи бўлиб, у аввал ҳам наркотик воситаларни Тожикистоннинг Сўғд вилоятидан Ўзбекистоннинг Бекобод туманига олиб ўтган экан. Тожикистонлик оғуфурушлар ҳайдовчига «юк» Уфага етиб боргач 70 минг доллар тўлашга ваъда берган.
Қайд этиш жоиз, бу тожикистонлик оғуфурушлар наркотик моддаларни Россияга олиб ўтиш учун Ўзбекистон ҳудудидан ва фуқароларидан фойдаланишга аввал ҳам бир неча марта уринган.
Ушбу ҳолат юзасидан Ўзбекистон Республикаси Жиноят кодексининг 246 («Контрабанда») ва 273 («Гиёҳвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш») моддлари бўйича жиноят иши қўзғатилган.
Изоҳ (0)