ИҲТ бош котиби Ўзбекистон мусулмонлари идораси вакиллари билан учрашди

8 июнь куни Ислом ҳамкорлик ташкилоти Бош котиби Ияд Амин Маданий бошчилигидаги делегация аъзолари Тошкент шаҳрининг диққатга сазовор жойларини зиёрат қилиш мақсадида «Ҳазрати имом» мажмуасига ташриф буюрди, деб хабар беради Ўзбекистон Республикаси Вазирлари Маҳкамаси ҳузуридаги Дин ишлари бўйича қўмита расмий сайти.

Меҳмонни Ўзбекистон мусулмонлари идораси раиси ўринбосари А.Мансуров, Дин ишлари бўйича қўмита халқаро алоқалар бўлими бошлиғи Д.Бобожонов ва Ўзбекистон мусулмонлари идораси халқаро алоқалар бўлими мудири М-А.Шокиров кутиб олди.

А.Мансуров ҳурматли меҳмонларга Ҳазрати имом мажмуаси тарихи, ушбу ерда амалга оширилган кенг бунёдкорлик ишлари, мажмуада жойлашган Усмон мусхафи тарихи тўғрисида сўзлаб берди. Меҳмон мажмуани кўздан кечириб, бу ердаги қадимий ёдгорликлар ислом тарихида юксак баҳоланишини таъкидлаб, эсдалик китобига ўзидаги илиқ таассуротларни баён қилди.

Мажмуага уюштирилган зиёрат якунлангач, меҳмон Ўзбекистон телеканалининг «Ахборот» ва «Давр» кўрсатувлари учун интервью берди.

Шу куннинг ўзида Ўзбекистон мусулмонлари идораси номидан меҳмон шарафига тушлик уюштирилди. Унда Дин ишлари бўйича қўмита раиси О.Юсупов ва Ўзбекистон мусулмонлари идораси раиси, муфтий У.Алимов қатнашди.

Тушликдан сўнг Ўзбекистон мусулмонлари идораси раиси, муфтий У.Алимов меҳмонларга эсдалик совғаларини топширди.