8-iyun kuni Islom hamkorlik tashkiloti Bosh kotibi Iyad Amin Madaniy boshchiligidagi delegatsiya a’zolari Toshkent shahrining diqqatga sazovor joylarini ziyorat qilish maqsadida “Hazrati imom” majmuasiga tashrif buyurdi, deb xabar beradi O‘zbekiston Respublikasi Vazirlari Mahkamasi huzuridagi Din ishlari bo‘yicha qo‘mita rasmiy sayti.
Mehmonni O‘zbekiston musulmonlari idorasi raisi o‘rinbosari A.Mansurov, Din ishlari bo‘yicha qo‘mita xalqaro aloqalar bo‘limi boshlig‘i D.Bobojonov va O‘zbekiston musulmonlari idorasi xalqaro aloqalar bo‘limi mudiri M-A.Shokirov kutib oldi.
A.Mansurov hurmatli mehmonlarga Hazrati imom majmuasi tarixi, ushbu yerda amalga oshirilgan keng bunyodkorlik ishlari, majmuada joylashgan Usmon musxafi tarixi to‘g‘risida so‘zlab berdi. Mehmon majmuani ko‘zdan kechirib, bu yerdagi qadimiy yodgorliklar islom tarixida yuksak baholanishini ta’kidlab, esdalik kitobiga o‘zidagi iliq taassurotlarni bayon qildi.
Majmuaga uyushtirilgan ziyorat yakunlangach, mehmon O‘zbekiston telekanalining “Axborot” va “Davr” ko‘rsatuvlari uchun intervyu berdi.
Shu kunning o‘zida O‘zbekiston musulmonlari idorasi nomidan mehmon sharafiga tushlik uyushtirildi. Unda Din ishlari bo‘yicha qo‘mita raisi O.Yusupov va O‘zbekiston musulmonlari idorasi raisi, muftiy U.Alimov qatnashdi.
Tushlikdan so‘ng O‘zbekiston musulmonlari idorasi raisi, muftiy U.Alimov mehmonlarga esdalik sovg‘alarini topshirdi.
Izoh (0)