Барак Обаманинг президент кутубхонаси Чикагода очилади

Оқ уйнинг ҳозирги хўжайини Барак Обаманинг президент кутубхонаси Американинг Иллинойс штати Чикаго шаҳрида очилади, дея хабар бермоқда ТАСС. Associated Press манбаларига кўра, ушбу танлов бевосита Обама томонидан қилинган.

Муассаса шаҳарнинг жануби-шарқий қисмидаги Чикаго университети базасида очилади. Тахминларга кўра, кутубхона Обаманинг оиласи уйига яқин жойда жойлашади. Унинг ўрнини расмий тартибда бир неча ҳафта ичида эълон қилишади.

Обама 2005—2008 йилларда Иллинойс штати сенатори бўлган, Чикаго университетида 10 йилдан ошиқ вақт ҳуқуқшуносликдан дарс берган.

Президентлар номи остида кутубхона очиш анъанаси АҚШда Франклин Рузвельт даврида пайдо бўлган. У 1939 йилда ўз китобларини АҚШ федерал ҳукуматига топширишини эълон қилган ва ўз ер-мулкидан музей-кутубхона қуриш учун майдон ажратган.