Олимлар европаликлар қачон оқ танли одамларга айланганини аниқлади
АҚШ Жисмоний антропология ассоциациясининг 84-анжуманида Гарвард антропологлари ўз маърузасини тақдим этди. Унга кўра, европаликларда оқ тери ва сигир сутини ҳазм қилиш қобилияти нисбатан яқинда — саккиз минг йил аввал пайдо бўлган, деб ёзади «Корреспондент.net».
Олимлар аниқлашича, Африкадан илк маротаба 40 минг йил аввал кириб келган замонавий одамлар қора танга эга бўлган. 8500 йил олдин ҳозирги Испания, Люксембург ва Венгрия ҳудудларида яшаган овчи-термачилар ҳам қора танли бўлган, уларда тери депигментациясини аниқловчи генлар бўлмаган.
7700 йил олдин эса европаликлар нафақат бундай генлар, балки кўк кўз, оқ-сариқ тери ва сочга алоқадор бошқа ген соҳибига айланган. Якуний оқ-сариқ тери Европага Яқин Шарқдан деҳқонлар кириб келиши билан шаклланган.
Шунингдек, европалик овчи-термачилар, шунингдек неолит давридаги муҳожирлар: яқин шарқлик деҳқонлар ва шарқий даштлардан келган чорвачиларда LCТ лактозасига толерантлик гени мавжуд бўлмаган. Бундай ген Европада 4300 йил аввал, бронза давридагина тарқалган.
