2015 йилнинг 4 март куни Ўзбекистон Республикаси делегацияси «Марказий Осиё + Япония» Мулоқоти юқори мансабдор шахсларининг ташқи ишлар вазирлари ўринбосарлари даражасидаги 9-Кенгашида иштирок этди. Бу ҳақда Ўзбекистон Ташқи ишлар вазирлиги матбуот хизмати хабар бермоқда.
Токио шаҳрида бўлиб ўтган кенгашда Қозоғистон, Қирғизистон, Тожикистон, Туркманистон ва Япония расмий вакиллари ҳам қатнашди.
Учрашувда Мулоқот доирасидаги қишлоқ хўжалиги соҳаси, наркотик моддаларнинг ноқонуний ҳаракатига қарши кураш ва иштирокчи давлатлар ўртасидаги ҳамкорликни чуқурлаштиришга йўналтирилган бошқа масалалар ҳам муҳокама қилинди.
Шунингдек, 2016 йилда Ашхобод шаҳрида бўлиб ўтадиган Мулоқот иштирокчи давлатлари ташқи ишлар вазирларининг 6-Кенгашига тайёргарлик жараёни ҳам муҳокама қилинди.
Изоҳ (0)