Ўзбекистон миллий терма жамоаси бош мураббийи Миржалол Қосимов Таиланддаги «Қирол Кубоги» доирасида Ўзбекистон U-22 ва Жанубий Корея U-22 ўртасидаги учрашувда юзага келган ҳолат бўйича фикрларини билдирди, деб хабар беради «Uff.uz».
Эслатиб ўтамиз, ушбу учрашувда Ўзбекистон U-22 футболчилари Жалолиддин Машарипов ва Тоҳир Шамсиддинов рақибга зарба бергани учун майдондан четлатилган эди.
«Ўша ҳолатни видео орқали кўрдим ва фақат шу бўйича фикр билдира оламан. Футболчиларимиз қилган ишни ҳеч қанақасига оқлаб бўлмайди. Бундай нарсалар дарҳол жазоланиши керак. Бошқа такрорланмаслиги учун ҳам шундай қилиш шарт.
Футболчи ҳар қандай ҳолатда ҳам жамоасига панд бермаслиги керак. Асосий таркибда ишонч билдирилиб майдонга тушдингми, жамоа учун борингни беришинг лозим. Футболда ҳар қандай ҳолат учраши мумкин. Масалан, собиқ иттифоқ ёшлар терма жамоаси таркибида жаҳон чемпионатида Боливия терма жамоасига қарши ўйнаганимизда рақиб футболчилари майдонга яширинча игна олиб тушиб, санчиб, жанжал чиқаришга уринган эди.
Баъзилар сўкиниб, туфуриб ва бошқа куракда турмайдиган қилиқлар билан провокация қилади. Бундай вақтда футболчи ўзини ушлаб туриши шарт. Қўл остимдаги ўйинчиларга ҳар доим шуни айтаман. Ҳозир ўғлим Миржамол футбол ўйнамоқда. Унга ҳам ҳар доим такрорлайман. Айниқса, бутун бошли мамлакат терма жамоаси таркибида майдонга тушганингда эгнингдаги либос ҳурматидан ҳам ўзингни босишинг шарт. Сен туфайли бутун бошли терма жамоа мағлубиятга учрамаслиги керак.
Жанубий Кореяга қарши кечган учрашувдаги ҳолат бўйича жазо бўлиши шарт. Акс ҳолда яна такрорланиши ҳеч гап эмас. Бошқаларга дарс бўлиши учун ҳам жазо бериш керак. Аммо бу билан футболчиларни батамом ‘синдириш’ ҳам ярамайди. Ўзи шундоқ ҳам улар қанчадир ўйинга четлатилиши турган гап. Ўша жазо ўтаб бўлингандан сўнг, улар билан яхшилаб гаплашиб олиш керак. Келажакда лозим бўлган тақдирда уларни терма жамоага ҳам чақирса бўлади. Аммо ҳозирча бу қилмиши қандай оқибатга олиб келишини яхшилаб фаҳмлаб олиши учун ҳам жазо бериш шарт», — деди Миржалол Қосимов.
Эслатиб ўтамиз, Миржалол Қосимов собиқ иттифоқ ўсмирлар терма жамоаси сафида 1987 йилда жаҳон чемпионатида иштирок этган ва ғолиб чиққан эди.
Изоҳ (0)